ریاست کی تمام عبادت گاہوں کو کھولنے کے مطالبے پر جامع مسجد کے چیئرمین شعیب خطیب نے واضح کیا کہ صرف مساجد نہیں بلکہ ہر مذہب کی عبادت گاہیں کھولنے کا مطالبہ حکومت سے کیا گیا ہے۔ ای ٹی وی بھارت سے گفتگو کے دوران چیئرمین شعیب خطیب نے کہا کہ 'حکومت کو خط لکھ کر مطالبہ کیا گیا ہے کہ مساجد سمیت دوسری عبادت گاہیں عوام کے لیے کھول دی جائیں۔ اس دوران کووڈ قوانین پر اسی طرح سے عمل کیا جائے گا جیسے پہلے کیا جارہا تھا۔
شعیب خطیب نے کہا کہ ہر جگہ حکومت نے راحت دی ہے تو پھر عبادت گاہوں کو اس سے دور کیوں رکھا گیا ہے؟
انہوں نے کہا کہ حکومت نے لاک ڈاؤن کو اَن لاک میں تبدیل کردیا ہے۔ ہر شعبہ سمیت تعلیمی اداروں کو بھی رعایت دی گئی ہے تو عبادت گاہوں کو اس سے اب تک کیوں محروم رکھا گیا ہے؟
شعیب خطیب نے مزید کہا کہ 'ممبئی کے بازار اور سیاحی مقامات بھی اَن لاک میں تبدیل کئے جاچکے ہیں اور ان مقامات پر کافی تعداد میں لوگوں کی آمد و رفت ہورہی ہے اس لیے اب مذہبی مقامات کو بھی کھول دینا چاہیے۔
