'بدعنوان افسران وقف املاک کو معمولی قیمت پر فروخت کر رہے ہیں'

مہاراشٹر کے ضلع اورنگ آباد میں مجلس اتحاد المسلمین کے کارکنان نے مہاراشٹر اسٹیٹ وقف بورڈ دفتر کے باہر مظاہرہ کیا۔ مجلس کے کارکنان کا الزام ہے کہ وقف بورڈ کے بدعنوان افسران نے کروڑوں کی وقف املاک کو معمولی قیمت میں لینڈ مافیا کے نام کر دیا جو کہ غریبوں، بیواؤں اور یتیموں کا حق تھا۔

مجلس اتحاد المسلمین نے وقف جائیداد کی بندر بانٹ کے خلاف محاذ کھول دیا ہے۔ ایم آئی ایم رہنماوں نے مہاراشٹر اسٹیٹ وقف بورڈ کے صدر دفتر کے باہر احتجاجی دھرنا دیا اور بد عنوان وقف افسران کے خلاف کارروائی کا مطالبہ کیا۔

ایم آئی ایم کا الزام ہے کہ وقف بورڈ کے بدعنوان افسران نے کروڑوں کی وقف املاک کو معمولی قیمت میں لینڈ مافیا کو فروخت کر دیا جبکہ اس پر غریبوں، بیواؤں اور یتیموں کا حق تھا۔

واضح رہے کہ دو روز قبل رکن پارلیمان امتیاز جلیل نے جالنہ روڈ پر وقف کی زمین پر تعمیر ایک عالیشان عمارت کے روبرو سینکڑوں کارکنان کے ہمراہ دھرنا دیا تھا۔ امتیاز جلیل کا کہنا ہے کہ جب تک وقف جائیدادوں پر ناجائز قبضہ ختم نہیں جاتا ان کی یہ مہم جاری رہے گی۔