ممبئی: سلمان خان شام 4 بجے اپنی سفید کار لیکر جنوبی ممبئی میں واقع ممبئی پولیس ہیڈکوارٹر پہنچے وہاں موجود پولیس عملہ اور دیگر افسران ان کی جھلک دیکھنے کے لیے جمع ہوگئے۔ اداکار نے پولیس کمشنر وویک پھنسلکر سے تقریبا نصف گھنٹے سے زائد ملاقات کی زرائع نے اسے رسمی ملاقات بتاتے ہوئے کہا کہ ملاقات کے دوران کسی کیس کے تعلق سے کوئی گفتگو نہیں ہوئی ۔ تاہم ذرائع نے بتایا کہ اداکار نے ریوالور کے لائسنس کے لیے درخواست دی ہے اور مقامی باندرہ پولیس اسٹیشن نے ان کی درخواست اور دستاویز کو کمشنر آفس میں بھیجا ہے۔
پولیس کمشنر سے ملاقات کے علاوہ اداکار نے وہاں جوائنٹ کمشنر آف پولیس (لا اینڈ آرڈر) وشواس نانگرے پاٹل سے بھی ملاقات کی۔ واضح رہیکہ گزشتہ ماہ سلمان خان اور ان کے والد سلیم خان کو ایک دھمکی آمیز خط موصول ہوا تھا جس میں انہیں پنجابی گلوکار سدھو موسے والا کی طرز پر جان سے مارنے کی دھمکی دی گئی تھی۔
خط کے بعد سلمان خان اور ان کے اہل خانہ کی سیکیورٹی بڑھا دی گئی تھی۔گلابی رنگ کا ٹی شرٹ اور سیاہ پینٹ زیب تن کئے خان نے کمشنر آفس میں چند پولیس کانسٹیبل سے مصافحہ بھی کیا۔ اس موقع پر منتظر میڈیا سے سلمان خان نے کوئی گفتگو نہیں کی بلکہ وہ سیدھے اپنی کار میں بیٹھ کر چلے گئے۔
یہ بھی پڑھیں: Threat letter to Salman Khan: سلمان خان اور ان کے والد کو جان سے مارنے کی دھمکی