ایک اعلی سطحی میٹنگ میں قربانی کے متعلق اصول وضوابط اور دیگر مسائل پر نائب وزیر اعلی نے وزیر اعلی ادھوٹھاکرے سے تبادلہ خیال کر کے ان مسائل کے ازالہ کا یقین سماجوادی پارٹی کے رہنما و رکن اسمبلی ابوعاصم اعظمی کی قیادت میں رکن اسمبلی رئیس شیخ اور مسلم نمائندہ وفد اور تنظیموں کے سربراہان مولانا خالد اشرف ۔ امن کمیٹی سربراہ فرید شیخ۔ یاسمین شیخ کو دلایا ہے۔
اس کے ساتھ ہی ممبئی پولیس کمشنر پرم بیر سنگھ ۔ بی ایم سی کمشنر اقبال سنگھ اور نتین کھیر بھی اس میٹنگ میں شریک تھے ۔اس میٹنگ میں عید قرباں کی تیاریوں اور کورونا وائرس کے دوران شہر اورریاست میں مسلمانوں کو ان کے مذہبی فریضہ او ر سنت ابراہیمی کی ادائیگی کی اجازت کا پرزور مطالبہ کیا گیا۔
ابوعاصم اعظمی کی روز اول سے ہی عیدالاضحی کے لیے قربانی کی اجازت سے متعلق یہ محنت رنگ لائی ہے اور 16 جولائی کی میٹنگ کے اس ضمن میں مثبت فیصلہ اور حکمنامہ کی توقع اور روشن امکان ہے۔
ابوعاصم اعظمی کے ہمراہ وفد نے کئی اہم مسائل کو اجیت پوار کے گوش گزار کیے جس میں سی اے اے ۔این آر سی کے دوران مظاہرین پر داخل کیس کے ساتھ ممبئی باغ کے مظاہرین پر درج کیس واپس لینے کا بھی مطالبہ کیا گیا اس کے علاوہ تبلیغی جماعت پر درج سنگین دفعات کے کیس کو بھی واپس لینے کا مطالبہ کیا گیا۔
اس پر نائب وزیر نے کہا کہ ان تمام مطالبات پر وزیر اعلی سے تبادلہ خیالات کے بعد ہی کوئی فیصلہ لیا جائے گا ۔اس کے ساتھ ہی عید قرباں کے معاملہ میں 16 جولائی کو ایک اہم میٹنگ منعقدکر کے قربانی کی اجازت سے متعلق مسئلہ کا حل کیا جائے گا ۔
اس سے قبل بھی ابوعاصم اعظمی نے عید قرباں کے لیے دیونار مذبح میں جانوروں کی فروخت کی اجازت طلب کی تھی اس کے ساتھ ہی علاقوں میں بھی جانوروں کی فروخت کے لیے عارضی اجازت کا مطالبہ کیا تھا توقع ہے کہ 16 جولائی کو قربانی کی اجازت ملنی طے ہے اور سرکار جانوروں کی فروخت سے متعلق بھی کوئی حکمنامہ جاری کرے گی ۔
