ریاست مہاراشٹر کے ضلع اورنگ آباد میں کورونا مریضوں کی تعداد میں مسلسل اضافہ ہو رہا ہے۔ ضلع میں کورونا مریضوں کی تعداد بڑھ کر 3632 ہوگئی ہے۔ کورونا وائرس کے مریضوں کی بڑھتی ہوئی تعداد سے انتظامیہ پریشان دکھائی دے رہا ہے۔ اورنگ آباد شہر میں 191 افراد کی کورونا سے اموات واقع ہوئی ہیں اور 1968 مریض کورونا سے ٹھیک ہو کر اپنے گھر چلے گئے ہیں۔ متاثرہ مریضوں کو ہوم کوارنٹین کیا گیا ہے۔ کورونا مریضوں کو ضلع کے مختلف ہسپتالوں میں علاج کے لیے رکھا گیا ہے۔
مریضوں کی بڑھتی تعداد کو دیکھتے ہوئے پولیس نے شہر میں جگہ جگہ چیک پوائنٹ لگائے ہیں تاکہ لوگ بے وجہ شہر میں نہ گھوم سکیں۔
انتظامیہ نے عوام سے اپیل کی ہے کہ لوگ اپنے گھروں میں ہی رہیں اور ضرورت کے وقت ہی گھر سے باہر نکلیں۔ سماجی فاصلہ کا خیال رکھیں۔ گھر سے باہر نکلتے وقت منہ پر ماسک لگا کر ہی نکلیں اور کورونا وائرس سے محفوظ رہیں۔ ساتھ ہی ایسا کرکے انتظامیہ کی مدد کریں۔
فی الحال اورنگ آباد ضلع میں کئی مقامات کو ہاٹ اسپاٹ قرار دیا گیا ہے۔ وہاں کے لوگوں کو اپنے زون سے باہر نکلنے کی اجازت نہیں دی گئی ہے۔ جن علاقوں میں مثبت مریض پائے جا رہے ہیں ان علاقوں کو پوری طرح سیل کر دیا گیا ہے اور وہاں پر سینیٹائزیشن کا کام کیا جا رہا ہے۔
