سدھی: مدھیہ پردیش میں ضلع سدھی کے مجھولی تھانہ کے تحت کرمائی گاؤں میں ایک موٹر سائیکل تیز رفتار بس کی زد میں آگئی۔ تصادم میں موٹر سائیکل پر سوار تین میں سے دو افراد موقع پر ہی ہلاک ہو گئے جبکہ ایک خاتون شدید زخمی ہو گئی۔ حادثے سے مشتعل گاؤں والوں نے بس میں توڑ پھوڑ کی۔ پولیس ذرائع کے مطابق بس مڑواس سے ریوا کی طرف جا رہی تھی۔ کرمائی گاؤں میں بیوہاری کی طرف سے آنے والی موٹر سائیکل سے تیز رفتار بس ٹکرا گئی۔ حادثے میں موٹر سائیکل سوار نند کمار سنگھ (30) اور منموہن سنگھ (22) کی موقع پر ہی موت ہو گئی۔ موٹر سائیکل میں پیچھے بیٹھی بھارتی سنگھ شدید زخمی ہو گئی۔ زخمی خاتون کو اسپتال میں داخل کرایا گیا۔
بتایا جاتا ہے کہ اگر مجھولی تھانہ کی پولس وقت پر موقع پر نہیں پہنچتی تو گاؤں والوں کا غصہ اور بھی شدید ہو جاتا۔ فی الحال پولس نے بس کو قبضے میں لے کر تھانے میں بحفاظت کھڑی کردی ہے اور حادثہ کی چھان بین کی جارہی ہے۔ وہیں ریاست چھتیس گڑھ میں ضلع کونڈاگاؤں کے فرش گاؤں تھانہ علاقہ کے تحت گاؤں کونگوڑ کے نزدیک گزشتہ صبح ایک تیز رفتار پک اپ بے قابو ہو کر الٹ گئی۔ اس حادثے میں ایک کمسن لڑکے کی موت ہو گئی۔ اس کے ساتھ ہی 9 افراد زخمی ہیں، جنہیں علاج کے لیے اسپتال میں داخل کرایا گیا ہے۔
