بابری مسجد اور رام مندر تنازع پر سپریم کورٹ کا فیصلہ آنے کے بعد آج وزیراعظم نے سنگ بنیاد رکھا ہے۔ جس پر سینئر صحافی ظفر عالم نے ای ٹی وی بھارت کو اپنا سخت رد عمل دیتے ہوئے کہا کہ 'آج اگر اس کو ایک لائن میں کہوں تو یہ ان کے لیے دیوالی ہے تو ہمارے لئے محرم ہے، کیونکہ مسلمانوں کے جذبات بابری مسجد سے صرف اس لئے نہیں جڑے ہوئے تھے کہ اس میں بابر کا نام جڑا ہوا ہے'۔
انہوں نے مزید کہا ہے کہ بابر کا نام اگر ہٹا بھی لیا جائے تو وہ مسجد ہے اور مسلمان کے جذبات مسجد سے جڑے ہوئے ہوتے ہیں۔ سپریم کورٹ کا جو فیصلہ آیا اس میں صاف لکھا ہوا ہے کہ بابری مسجد کی شہادت کے نشان تو ملے ہیں لیکن مندر کے ثبوت نہیں۔ اس کے باوجود مسلمانوں نے کورٹ کے فیصلے کو تسلیم کرلیا مگر کہیں نہ کہیں ان کے دل میں یہ ملال ضرور ہے کہ یہ فیصلہ زبردستی کا ہے پھر بھی اس فیصلے کو قبول کرلیا ہے۔
لیکن انشاءاللہ جس دن اللہ کی عدالت میں سچ اور حق کا فیصلہ ہوگا اس دن ہمارے ساتھ رام بھی کھڑے ہوں گے اور رحیم بھی کھڑے ہوں گے اور ہم مقدمہ بھی جیتیں گے۔
