ریاست مدھیہ پردیش کے دارالحکومت بھوپال میں مجلس اقبال اور مسلم ویلفیئر سوسائٹی کے مشترکہ بینر تلے بھوپال میں قومی سیمینار کا انعقاد کیا گیا- بھوپال منشی حسین خان ٹیکنیکل انسٹی ٹیوٹ میں اردو اور نئی نسل کے عنوان سے منعقدہ سیمینار میں ممتاز ادیبوں نے شرکت کی اور نئی نسل کو اردو سے جڑنے کے لیے منظم طریقے سے کام کرنے پر زور دیا-
ملک میں اردو کے فروغ کے لیے اکادمیوں کے ساتھ ساتھ بہت سے ادارے کام کر رہے ہیں لیکن یہ ادارے اردو کے فروغ کو چھوڑ کر ادیبوں کے فروغ کے لیے کام کر رہے ہیں۔ یہی وجہ ہے کہ ملک میں زبان کے فروغ کو نئی نسل تک پہنچانے کا کام متاثر ہو رہا ہے-
بھوپال میں منعقدہ سیمینار میں دانشوروں نے اردو کے فروغ کے لیے زبان کو نئی نسل تک پہنچانے اور اس کے لیے زمینی سطح پر کام کرنے پر زور دیا- سمینار میں ادیبوں نے اردو کو نئی نسل تک پہنچانے کے لیے اردو کی فلاحی انجمنوں کے ذریعے زمینی سطح پر کام کرنے پر زور دیتے ہوئے کہا کہ اردو زبان کو نئی نسل تک پہنچانے کے لیے جب تک موثر انتظام نہیں کیا جائے گا، اس وقت تک زبان کے فروغ کی راہ یقین نہیں بنائی جا سکتی ہے۔
