مدھیہ پردیش کے شیو پوری ضلع میں پوہری تھانہ علاقہ ککرا گاؤں کے پاس جمعہ کو بھیانک سڑک حادثہ ہوگیا۔ اس حادثہ میں 11 لوگوں کی دردناک موت ہوگئی۔
وہیں کئی لوگ زخمی ہوگئے۔ حادثہ کی اطلاع ملنے کے بعد پولیس موقع پر پہنچی اور ایمبولینس سے زخمیوں کو پوہری اسپتال لایا گیا۔ کئی زخمیوں کی حالت سنگین بنی ہوئی ہے۔ جس کی وجہ سے انہیں ضلع اسپتال ریفر کیا گیا ہے۔
ککرا گاؤں کے پاس بھیانک سڑک حادثہ کی جانکاری ملتے ہی شیو پوری کلکٹر صدر کمار سنگھ اور ایس پی راجشی سنگھ چندیل ضلع اسپتال پہنچے جہاں زخمیوں کے بہتر علاج کا انتظام کرایا جارہا ہے۔
اطلاع کے مطابق وجے پور تحصیل کے ڈھنڈری خرد اور ڈھوری گاؤں کے گوجر سماج کے لوگ کراہت تحصیل کے میراون میں ایک شوک سبھا میں شامل ہونے گئے تھے۔ میراون سے لوٹتے وقت پوہری شیوپور روڈ پر ککرا گاؤں کے پاس جمعہ کی شام تقریباً 6:45بجے تیز رفتار پک اپ گاڑی موڑ پر بے قابو ہوکر پلٹ گیا۔
پک اپ میں سوار تقریباً 40 لوگوں میں سے 8 لوگوں کی جائے حادثہ پر ہی موت ہوگئی جبکہ تین نے اسپتال پہنچ کر دم توڑ دیا۔ زخمیوں کا اسپتال میں علاج جاری ہے۔
