بھارتی ریاست مدھیہ پردیش کے دارالحکومت بھوپال میں سہ روزہ قرآن فہمی کے موضوع پر تربیتی کیمپ کا انعقاد کیا گیا ہے جس کا مقصد قرآن کریم کو آسان زبان میں سمجھنا ہے۔
قرآن مجید کلام الہی اور کتابِ ہدایت ہے- اس ہدایت نامہ کو سمجھنے کے لئے اللہ تعالی نے فرمایا ہے ' ہم نے نصیحت کے لئے قرآن کو آسان کر دیا ہے کوئی جو نصیحت پکڑے ( سورہ قمر )۔
انڈر اسٹینڈ القرآن اکیڈمی ایک بین الاقوامی ادارہ ہے جو گذشتہ کئی برسوں سے بڑی کامیابی کے ساتھ ملک اور بیرون ملک میں تفہیم و تسہیل قرآن مجید، قرآن کے الفاظ کے معنی سائنٹیفک اور آسان طریقے سے سمجھنے کی ٹریننگ دے رہا ہے- عصر حاضر میں امت اسلامیہ کی یہ اہم اور مفید ضرورت ہے-
اس پروگرام کا مکمل تعارف، اغراض و مقاصد اور ٹریننگ کے طریقوں پر روشنی ڈالنے کے لئے اکیڈمی کے انٹرنیشنل ٹرینر عبدالرحیم نعیم الدین، حیدرآباد سے تشریف لائے اور انہوں نے عربی زبان کو عام زبانوں کی طرح کس طرح سے پڑھا جائے اور کیسے پڑھا جائے اسے بہت اچھے طریقے سے لوگوں کو بتایا-
انہوں نے کہا جس طرح سے ہندی، اردو اور انگریزی زبان کو کھیل کھیل میں سمجھا اور پڑھا جا رہا ہے۔ ویسے ہی عربی زبان کو بھی پڑھنے اور سمجھنے کی ضرورت ہے اور انہوں نے عربی کو اپنی اکیڈمی کی میتھک کے ذریعے لوگوں کو قرآن سمجھنے اور پڑھنے کا طریقہ بتایا-
وہیں آج کے پروگرام میں تشریف لائے لوگوں نے قرآن کو پڑھنے اور سیکھنے کے طریقے پر خوشی کا اظہار کیا اور بتایا کہ جس طرح سے انڈر سٹینڈ القران اکیڈمی نے قرآن کی زبان عربی کو سمجھنے اور سمجھانے کا طریقہ نکالا ہے وہ بہت ہی آسان اور خوش آئین ہے-
