مورینا میں دو برادریوں کے درمیان تنازع ، حکم امتناعی نافذ

راجہ میہر بھوج کے مجسمے کے تعلق سے دو گروپوں کے درمیان ہوا تنازعہ گوالیار سے اب مورینا پہنچ گیا ہے۔ مورینا میں 12 سے زائد نوجوانوں نے بسوں میں توڑ پھوڑ کی۔ اس کے بعد ضلعی انتظامیہ نے شہر کے کوچنگ انسٹی ٹیوٹس کو تین دن کے لیے بند کر دیا ہے۔

ریاست مدھیہ پردیش کے گوالیار میں واقع راجہ میہر بھوج کے مجسمے کے تعلق سے دو گروپوں کے درمیان کشیدہ حالات کے پیش نظر ضلع انتظامیہ نے آج سے ضلع میں حکم امتناعی نافذ کرنے کے ساتھ ہی تمام کوچنگ سینٹروں کو آنے والے تین دنوں کے لئے بند کرنے احکامات جاری کیے ہیں۔

پولیس ذرائع کے مطابق راجہ میہر بھوج کے مجسمہ پر درج ایک مخصوص کمیونٹی کے الفاظ کو ہٹانے کے مطالبہ کے تعلق سے کل ایک برادری کے نوجوانوں نے جلوس نکال کر پرانی کلکٹریٹ پر مظاہرہ کیا اورشہر میں لگے ایک برادری کے دیوتاوں کے ہورڈنگز اور پوسٹر پھاڑے۔ پوسٹر پھاڑنے کے بعد دوسری برادری کے لوگوں نے پولیس حکام سے ملاقات کی اور مطالبہ کیا کہ پوسٹر اور ہورڈنگز پھاڑنے والوں کے خلاف کارروائی کی جائے۔

دوسری جانب آگرہ ممبئی قومی شاہراہ پر واقع نورآباد پر وہاں سے نکلنے والی گاڑیوں میں نقاب پوش نوجوانوں نے توڑ پھوڑ کی۔ دونوں برادریوں کے درمیان کشیدہ صورتحال کے پیش نظر ضلع مجسٹریٹ بی کارتکین نے آج مورینا ضلع میں دفعہ 144 نافذ کردی اور اگلے تین دن کے لیے کوچنگ سینٹرز بند کرنے کا حکم دیا۔ حکم میں کہا گیا ہے کہ سوشل میڈیا پر کوئی بھی اشتعال انگیز پوسٹ کرنے والے کے خلاف بھی سخت کارروائی کی جائے گی۔

یواین آئی