مدھیہ پردیش ہائی کورٹ نے ریاست کے غیر رکن اسمبلی وزرا کے معاملے میں دائر درخواست پر سماعت کے دوران آج اسمبلی کے اسپیکر، وزیراعلیٰ، چیف سکریٹری اور دیگر کو نوٹس جاری کرکے جواب طلب کیا ہے۔
ہائی کورٹ کے قائم مقام چیف جسٹس سنجے یادو اور جج راجیو کمار دوبے کی بنچ نے چھندواڑہ کی ایک خاتون وکیل کی جانب سے تقریباً پندرہ روز قبل داخل درخواست پر سماعت کے دوران نوٹس جاری کیے۔
عدالت نے درخواست میں بنائے گئے فریقوں کو نوٹس جاری کیے ہیں۔ درخواست میں گورنر، مرکزی حکومت، الیکشن کمیشن آف انڈیا اور 14 غیر رکن اسمبلی وزرا کو بھی فریق بنایا گیا ہے۔
درخواست پر اگلی سماعت 14 دسمبر کو ہونے کی توقع ہے۔ درخواست گزار نے عدالت کو درخواست کے ذریعہ سے بتایا کہ موجودہ حکومت میں 14 غیر ایم ایل اے افراد کو وزیر بنایا گیا ہے جو آئینی شقوں کے مطابق نہیں ہے۔
اس میں کہا گیا ہے کہ آئین کے آرٹیکل 164 (4) کا استعمال صرف غیر معمولی معاملات میں ہی کیا جاسکتا ہے۔ اس ایکٹ میں غیر رکن اسمبلی کو زیادہ سے زیادہ چھ ماہ کے لیے وزیر بنائے جانے کا التزام ہے۔ درخواست میں التجا کی گئی ہے کہ متعلقہ وزرا کی تقرری کو منسوخ کرنے کے لیے عدالت کی جانب سے حکم دیا جائے۔
