پورے ملک کے ساتھ ریاست مدھیہ پردیش بھی کورونا کے اثرات سے متاثر ہے۔جسے دیکھتے ہوئے سماجی تنظیمیں لگاتار لوگوں کی مدد کرنے کا کام کر رہی ہے۔انہی سب حالات کے مدنظر بھوپال کی تنظیم مولانا برکت اللہ بھوپالی ایجوکیشن سوسائٹی اور جمعیت علماء ہند کی جانب سے کورونا کرفیو اور رمضان المبارک کے پہلے روز سے ضرورت مندوں کی ہر ممکن مدد کی جا رہی ہے۔
دراصل کورونا وبا کی وجہ سے تکلیفوں اور پریشانیوں نے لوگوں کی کمر توڑ کر رکھی ہے۔یہی وجہ ہے کہ مولانا برکت اللہ بھوپالی سوسائٹی اور جمعیت علماء ہند لگاتار ضرورت مندوں کی خدمت کر رہی ہے۔
ان دونوں تنظیموں کے ذریعہ لوگوں کو روزانہ راشن کٹ، کھانے کے پیکٹ اور ہری سبزیاں پہنچانے کا کام کیا جا رہا ہے۔وہیں ایسے میں رمضان اور عید کی خوشیوں کو بھی درکنار نہیں کیا جا سکتا ہے۔
گزشتہ سال بھی کورونا کی وجہ سے اسی طرح کے حالات پیدا ہوئے تھے اور لوگوں کو بے روزگار اور معاشی بحران جیسے مسائل کا سامنا کرنا پڑ رہا تھا، اسی طرح لوگوں کی مدد کی جارہی تھی۔
مولانا برکت اللہ بھوپالی ایجوکیشنل سوسائٹی اور جمعیت علماء ہند نے یہ فیصلہ کیا ہے کہ "اب کی عید سب کی عید" ہو اسی بات کو ذہن میں رکھتے ہوئے تنظیموں نے ایک قدم اور آگے بڑھاتے ہوئے عید کی خوشیاں ضرورتمندوں کے ساتھ منارہے ہیں۔
انہوں نے عید کی تیاریوں کو دیکھتے ہوئے بچوں اور بچیوں میں نئے کپڑے اور شیر خورما کی کٹ تقسیم کرنا شروع کردیا ہے، تاکہ ضرورت مند بھی ہمارے ساتھ عید کی خوشیوں میں شامل ہوسکے اور اس مصیبت کے وقت میں سب کا خیال رکھا جا سکے ۔
