مدھیہ پردیش میں اب اَن لاک کر دیا گیا ہے۔ دارالحکومت بھوپال میں کورونا لاک ڈاؤن ختم ہونے کے بعد اب عوام احتیاطی تدابیر کے تئیں لاپرواہ ہوتے جا رہے ہیں۔ صبح تا شام شہر کے بازاروں میں ہجوم سے واضح ہے کہ سوشل ڈسٹنسنگ کی خلاف ورزی ہورہی ہے۔
شہر کی دکانوں، ہوٹلوں، کاروباری اداروں حتیٰ کہ سرکاری اور نجی دفاتر میں بھی بڑی تعداد میں لوگ بغیر ماسک کے اپنے کاموں میں مصروف ہیں۔
لوگ معمول کے مطابق اپنے کاروبار اور دیگر سرگرمیوں میں مصروف ہیں۔ اشیائے ضروریہ کی خریداری کے لیے بازاروں، سبزی منڈیوں، گوشت اور دودھ کی دکانوں پر گاہکوں کا ہجوم دیکھا جا سکتا ہے۔
کورونا وائرس کی دوسری لہر کا اثر تقریباً ختم ہونے کو ہے۔ وہیں کورونا وائرس کی تیسری لہر کے اندیشے اور ڈیلٹا پلس کے بڑھتے معاملوں کے درمیان لاک ڈاؤن سے راحت کو لوگوں کے ذریعہ سنجیدگی سے لینے اور کورونا پروٹوکول پر عمل کرنے کی سخت ضرورت ہے۔
یہ بھی پڑھیں: اندور: مسلم علاقوں میں خواتین نے ٹیکے لگوائے
ضلع انتظامیہ کی جانب سے مانیٹرنگ کے لیے بنائی گئی ٹیم بھی اب ندارد ہے۔ کہیں کوئی روک ٹوک کرتا نظر نہیں آرہا۔ تیسری لہر کے اندیشے کے پیش نظر یہ تمام صورتحال خوش آئند نہیں ہے۔
