ریاست مدھیہ پردیش کے وزیر اعلی کمل ناتھ نے نیشنلزم کا ذکر کرتے ہوئے وزیراعظم نریندر مودی سمیت بھارتیہ جنتا پارٹی پر جم کر حملہ کیا۔
کمل ناتھ نے کہا کہ 'یہ لوگ کانگریس کو نیشنلزم کا سبق پڑھائیں گے ۔جب کہ میں ہمیشہ کہتا ہوں کہ وزیراعظم نریندر مودی جی ایک نام بتا دیں جو آپ کی پارٹی کا مجاہد آزادی رہا ہوں یا آپ کا کوئی رشتہ دار ہو اور یہ نیشنلزم کا سبق کانگریس کو پڑھانے آتے ہیں۔'
وزیراعلی کمل ناتھ نے کانگریس سیوا دل کے قومی سیمینار میں خطاب کرتے ہوئے کہا کہ 'ہمارے ملک کی ثقافت رواداری والی ہے۔ یہی ہمارے آئین کی روح ہے۔ آج اس پر جس طرح کا حملہ ہو رہا ہے۔ اس کا مستقبل پر کیا اثر پڑے گا۔ یہ سوچ کر بے چینی ہوتی ہے ۔آخر ملک میں ایسی کون سی آفت آ گئی ہے جو صرف این آر سی جیسے معاملات پر ہی دھیان دیا جا رہا ہے۔'
ساتھ ہی دیپیکا پادوکون کی فلم چھپاک کو مدھیہ پردیش میں ٹیکس فری کرنے کا اعلان کرتے ہوئے کہا کہ 'ہم دیپیکا کو مدھیہ پردیش میں دعوت دیں گے اور ان کا یہاں اعزاز کیا جائے گا۔'
