کیلاش وجے ورگیہ کا متنازع بیان، عارف مسعود کا رد عمل

بھارتیہ جنتا پارٹی اور ٹی ایم سی کے درمیان جاری رشہ کشی کے درمیان بی جے پی کے قومی سیکرٹری کیلاش وجے ورگیہ نے پریس کانفرنس سے خطاب کرتے ہوئے متنازع بیان دے دیا۔ انہوں نے کہا کہ جس طرح اسلام تلوار کی زور پر پھیلا ہے، ٹھیک اسی طرح ٹی ایم سی میں بھی لوگ خوف کی وجہ سے شامل ہورہے ہیں۔

بھارتی جنتا پارٹی کے قومی جنرل سیکریٹری کیلاش وجے ورگیہ کا متنازع بیان سامنے آیا ہے۔ انہوں نے ایک پریس کانفرنس سے خطاب کرتے ہوئےکہا کہ' جس طرح سے اسلام تلواز کے زور پر پھیلا اسی طرح بنگال میں ٹی ایم سی بھارتیہ جنتا پارٹی کے لیڈران کو زبدستی ٹی ایم سی میں شامل کررہی ہے'۔

انہوں نے اپنی پریس کانفرنس میں کہا کہ بنگال میں جو بھی بھارتی جنتا پارٹی کا لیڈر جاتا ہے اور وہاں کام کرتا ہے، بنگال کی سرکار ان پر فرضی کیس درج کردیتی ہے۔ بنگال میں نظم و نسق پوری طرح سے ختم ہو چکا ہے۔ انہوں نے کہا کہ خود مجھ پر 20 سے زائد کیس درج کیے گئے ہیں۔'

کیلاش وجے ورگیہ کے اس متنازع بیان پر بھوپال کانگریس کے رکن اسمبلی عارف مسعود نے سخت ردعمل کا اظہار کرتے ہوئے کہا کہ' کیلاش وجے ورگیہ ریاست مدھیہ پردیش میں بھی دیکھیں کہ بی جے پی کی حکومت کس طرح کے کارناموں کو انجام دے رہی ہیں۔ بے گناہوں کو جیلوں میں ڈالا جا رہا ہے۔'

عارف مسعود نے اسلام پر دیے گئے متنازع بیان پر کہا کہ مذہب اسلام تو یہ سکھاتا ہے کہ اگر آپ کا پڑوسی بھوکا سو رہا ہے اور اگر آپ نے بھر پیٹ کھانا کھا لیا تو اللہ کے یہاں تمہاری پکڑ ہوگی۔ یہ اسلام کا پیغام ہے۔'

انہوں نے کہا کہ کیلاش وجے ورگیہ کو چاہیے کہ اسلام کے بارے میں پڑھیں، جانکاری حاصل کریں۔ اسلام انسانیت، محبت اور امن پھیلانے والا مذہب ہے۔ نفرتوں کو ختم کرنے والا ہے۔

انہوں نے کہا کہ کیلاش وجے ورگیہ جس شاخ سے آتے ہیں وہاں نفرت سکھائی جاتی ہے۔ وہیں مذہب اسلام امن و محبت سکھاتا ہے۔ یہ اسلام نے ہی تلقین کی ہے جس ملک میں رہو اس ملک سے محبت کرو۔ اسی کا نتیجہ ہے کہ ہمارے مجاہدین آزادی ملک کو آزاد کرنے کے لیے پھانسی کے تختوں پر چڑھ گئے۔'