بھوپال: ریاست مدھیہ پردیش کے دارالحکومت بھوپال سے تعلق رکھنے والے سماجی کارکن عابد حسین نے حاجی محمد آصف خان کو جدہ ایئرپورٹ پر امیریگشن چیکنگ کے دوران گرفتار کرنے پر افسوس کا اظہار کیا۔ انہوں نے کہا کہ ہم ایسے واقعہ کی مذمت کرتے ہیں، کیا سعودی عرب اپنے مہمانوں کا اس طرح سے استقبال کرتے ہیں؟ انہوں نے مزید کہا کہ کوئی 16 سال پرانا کیس تھا، جس میں مذکورہ حاجی کی شکل ملزم کے مشابہ تھی اور اسی غلط فہمی کے بنیاد پر انہیں گرفتار کیا گیا، لیکن بعد میں تحقیقات کے بعد انہیں رہا کردیا گیا۔
بتادیں کہ مدھیہ پردیش کے ضلع چھتر پور سے تعلق رکھنے والے حاجی محمد آصف خان اپنی اہلیہ سمیت 50 سے زیادہ لوگوں کے ساتھ حج کرنے گئے تھے، اس دوران جدہ ایئرپورٹ پر امیگریشن چیکنگ کے دوران انہیں پولیس نے گرفتار کر لیا۔ کیونکہ حاجی محمد آصف خان کی شکل و صورت ایک ملزم سے ملتی جلتی تھی جو 16 سال پرانے کیس میں مطلوب ہے۔ حاجی محمد آصف خان ریاستی حکومت کے محکمہ اعلیٰ تعلیم میں افسر رہ چکے ہیں۔
محمد آصف خان نے وضاحت کی کہ وہ اپنی زندگی میں پہلی بار سعودی عرب کا دورہ کر رہے تھے اور ملک میں ایک سرکاری اہلکار تھے، لیکن مزید تفتیش کے لیے انہیں ہوائی جہاز سے دمام لے جایا گیا اور پھر انہیں مبارس پولیس سٹیشن بھیج دیا گیا۔ آصف خان جو کہ شوگر اور ہائی بلڈ پریشر کے شدید مرض میں مبتلا ہیں، سعودی میں ان کی مدد کے لیے کوئی اور رشتہ دار نہیں تھا۔ وہ ایک اجنبی ملک میں کسی نامعلوم جرم کی وجہ سے مصیبت میں پھنس گئے تھے۔
مزید پڑھیں:۔ Haj 2023 لاکھوں حجاج کرام کے لیے روزانہ ایک ملین کیوبک میٹر سے زیادہ زمزم کا نظم
دمام نوودیا کے سرپرست اور سماجی کارکن حنیفہ میواتپوزا اور بھارتی سفارت خانے کی مداخلت کی وجہ سے پولیس نے حج کی عارضی اجازت دے دی۔ وہ حج میں شرکت کے لیے اتوار کی شام جدہ روانہ ہو گئے ہیں۔ حنیفہ میواتپوزا نے کہا کہ عید کی تعطیلات کے بعد سفارتخانے کی مدد سے پرانی فائلوں کو واپس لانے اور جدہ سے گھر بھیجنے کی کوشش کی جا رہی ہے۔
