'پچانوے فیصد طلبا دینی تعلیم سے دور'

ریاست مدھیہ پردیش کے دار الحکومت بھوپال میں جمعیت علماء ہند کی جانب سے دینی تعلیمی بیداری مہم کا اختتام ہوا اور اس موقع پر ایک ریلی کا انعقاد کیا گیا۔

اس موقع پر جمعیت علمائے ہند مدھیہ پردیش کے جنرل سکریٹری محمد کلیم نے ای ٹی وی بھارت بات چیت کی۔

انہوں نے کہا کہ دینی تعلیمی بیداری مہم جمعیت علماء ہند کے صدر مولانا محمود مدنی کی قیادت میں چلائی جا رہی تھی- جس کا آج اختتامی پروگرام منعقد کیا گیا-

اس اختتامی پروگرام میں ایک ریلی نکالی گئی جس میں کثیر تعداد میں مدارس کے طلباءنے شرکت کی-

جنرل سکریٹری محمد کلیم نے دینی تعلیمی بیداری مہم کے مقاصد کو بیان کرتے ہوئے کہا کہ اس مہم کا مقصد مسلم طلباء میں دینی تعلیم کی فکر اور دینی شعور پیدا کرنا تھا-

انہوں نے کہا بھارت میں پانچ فیصد طلباء مدرسوں میں دینی تعلیم حاصل کررہے ہیں جبکہ 95 فیصد مسلم طلباء جدید تعلیم حاصل کر رہے ہیں۔

اور یہ 95 فیصد مسلم طلباء دینی تعلیم سے کافی حد تک دور رہ جاتے ہیں- اسی فکر کو لے کر جمعیت علماء ہند نے اس مہم کا آغاز کیا۔

وہیں اس مہم کے تحت بھوپال کے مختلف علاقوں میں جلسوں اور ریلیوں کے ذریعے لوگوں میں دینی تعلیم کے تئیں بیداری پیدا کرنے کی کوشش کی گئی-