مزدوروں کو واپس لانے کے مطالبے پر کانگریس کا مظاہرہ

ریاست مدھیہ پردیش کے جھبوا ضلع ہیڈ کوارٹر واقع مجسٹریٹ دفتر کے سامنے کانگریس نے مظاہرہ کرکے گجرات اور راجستھان میں پھنسے ریاست کے مزدروں کو واپس لانے کا مطالبہ کیا ہے۔

کانگریس رکن اسمبلی کانتی لال بھوریا مجسٹریٹ کے دفتر کے سامنے باغیچے میں اپنے حامیوں کے ساتھ مظاہرے پر بیٹھ گئے ہیں۔ مظاہرے پر بیٹھے مسٹر بھوریا نے کہا کہ جھبوا اور علی راج پور ضلع کے سینکڑوں قبائلی مزدور گجرات اور راجستھان میں لاک ڈاؤن کے سبب پھنسے ہوئے ہیں۔ وہاں پر ان کے رہنے اور کھانے کا بحران پیدا ہوگیا ہے۔

انہوں نے کہا کہ جس طرح سے طلبا کو لایا گیا ہے ویسے ہی مزدوروں کو واپس لایا جائے۔

انہوں نے کہا کہ اس کے لیے انہوں نے گورنر کے نام مجسٹریٹ کو میمورنڈم سونپا ہے۔