مدھیہ پردیش میں کورونا کے کیسز میں مسلسل اضافہ، نئی گائیڈ لائن نافذ

مدھیہ پردیش کے وزیراعلی شیوراج سنگھ چوہان نے کہا کہ ریاست میں کورونا کے بڑھتے معاملوں کو دیکھتے ہوئے احتیاطی اقدامات کرنا ضروری ہے۔ ایسے میں ہولی کے تہوار کو اپنے گھروں تک محدود کرتے ہوئے ’میری ہولی میرے گھر‘ کہ اصولوں کی تقلید کرنے پر شیوراج سنگھ چوہان نے زور دیا۔

وزیراعلی نے کہا کہ پوری ریاست میں عوامی جلسہ و دیگر تقاریب پر پابندی عائد رہے گی۔ ایسے سبھی اضلاع میں جہاں کورونا کیسز میں تیزی سے اضافہ ہو رہا ہے وہاں شادی کی تقاریب، آخری رسومات و دیگر محفلوں میں شرکت کرنے والے افراد کی تعداد کو محدود کیا جارہا ہے۔ اس سلسلے میں محکمہ داخلہ کے ذریعہ ہدایات جاری کی گئیں۔

مدھیہ پردیش میں کورونا کیسز میں تیزی سے اضافہ ہو رہا ہے گذشتہ 24 گھنٹوں میں 1712 نئے کیسز سامنے آئے اور 7 اموات درج کی گئیں۔ریاست میں فعال کیسز کی تعداد بڑھ کر دس ہزار 47 تک ہوگئی۔ وہیں گزشتہ 24 گھنٹوں کے دوران ریاست میں 25 ہزار 505 نمونوں کی جانچ کی گئی جن میں 1712 افراد کو کورونا سے متاثر پایا گیا۔ حکومت کی جانب سے کورونا سے متعلق نئی گائیڈلائین نافذ کی گئی ہے۔