بھوپال: مدھیہ پردیش کے وزیر اعلی شیوراج سنگھ چوہان نے آج ریاست میں فلم ’’دی کیرالہ اسٹوری‘‘ کو ٹیکس فری کرنے کا اعلان کیا۔ شیوراج سنگھ چوہان نے ایک ٹویٹ کے ذریعے یہ اعلان کیا۔ انہوں نے ٹویٹ کے ذریعے ایک ویڈیو پیغام بھی شیئر کیا ہے۔ شیوراج سنگھ چوہان نے لکھا ہے 'دہشت گردی کے خوفناک سچائی کو بے نقاب کرنے والی فلم 'دی کیرالہ اسٹوری' کو مدھیہ پردیش میں ٹیکس فری کیا جا رہا ہے۔ اپنے ویڈیو پیغام میں وزیر اعلیٰ شیوراج نے کہا کہ یہ فلم لو جہاد، تبدیلی مذہب اور دہشت گردی کی سازش کو بے نقاب کرتی ہے۔
اس کا مکروہ چہرہ سامنے لاتی ہے۔ کچھ بیٹیاں کیسے لو جہاد کے جال میں پھنس جاتی ہیں اور پھر کیسے برباد ہو جاتی ہیں، یہ اس فلم میں بتایا گیا ہے۔ یہ دہشت گردی کے ڈیزائن کو بھی ظاہر کرت ہے۔وزیر اعلیٰ نے کہا کہ یہ فلم ہمیں آگاہ کرتی ہے۔ مدھیہ پردیش میں ہم پہلے ہی مذہب کی تبدیلی کے خلاف قانون بنا چکے ہیں۔ لیکن یہ فلم سب کو آگاہ کرنے کا کام کرتی ہے۔ یہ فلم لڑکوں، لڑکیوں اور سب کو دیکھنی چاہیے۔ اسی لیے انہوں نے اس فلم کو ٹیکس فری بنانے کا فیصلہ کیا ہے۔
دوسری جانب مذہبی ہم آہنگی تباہ کرنے کے لیئے بنائی گئی متنازع 'کیرالہ اسٹوری' نامی فلم کی ریلیز پر فوری پابندی لگانے کے لئے جمعیۃ علماء ہند و دیگر فریقین کی جانب سے داخل پٹیشن پر کل کیرالہ ہائی کورٹ کی دو رکنی بینچ کے روبرو خصوصی سماعت کے دوران عدالت نے ایک طرف جہاں فلم کی نمائش پر پابندی لگانے سے انکار کردیا تھا۔ وہیں دوسری جانب فلم کے پروڈیوسر کو حکم دیا کہ وہ فلم کے متنازعہ ٹریلر کو ہٹائیں جس میں دکھایا گیا ہے کہ کیرالہ سے 32000 / لڑکیوں نے مذہب تبدیل کرکے اسلام قبول کیا اور پھر وہ داعش میں شامل ہوگئیں۔
یو این آئی
