بھوپال: آل انڈیا اتحاد المسلمین کے سیکرٹری توقیر نظامی نے کانگرس پارٹی کے سینیئر لیڈر اور سابق وزیراعلی دگ وجے سنگھ کو خط لکھ کر کانگرس کے ریاستی دفتر میں عید الاضحی کی نماز ادا کرنے اور قربانی کرنے کا مطالبہ کیا تھا، آل انڈیا اتحاد المسلمین کے سیکرٹری توقیر نظامی نے کہا تھا کہ مذہب آپسی محبت کی دکان ہے۔ کانگرس کے لیڈر راہل گاندھی پورے ملک میں محبت کی دکانیں کھول رہے ہیں اور یہاں ریاست مدھ پردیش میں کمل ناتھ ہارڈ ہندوتوا کی راہ پر گامزن ہیں۔
انہوں نے کہا تھا کہ کانگرس کی دفتر میں ایک خاص مذہب کے لوگ ہنومان چالیسہ پڑھتے ہیں اور ان کے مذہب کے دیوی دیوتاؤں کی پوجا کی جاتی ہے۔ اس لیے ہم مسلم طبقے کے لوگ مطالبہ کر رہے ہیں کی ہمیں بھی کانگرس کے دفتر میں عید الاضحی کی نماز ادا کرنے دی جائے اور قربانی بھی کرنے دی جائے۔ ہمیں دلت طبقہ، پسماندہ طبقہ، قبائل طبقہ اور عیسائی طبقے کے تہواروں کو منانے کی اجازت دی جائے اور اگر ایسا نہیں کرنے دیا جاتا ہے تو آپ یہ بتائیں کہ آپ کی محبت کی دکان ایک کسی خاص طبقے کے لیے ہے۔
اس موقع پر کانگرس کے رکن اسمبلی پی سی شرما نے کہا کہ آل انڈیا اتحاد المسلمین بھارتی جنتہ پارٹی کی بی ٹیم ہے، اور یہ بات ثابت اس بات سے ہوتی ہے کہ انہوں نے اس طرح کا خط دگ وجے سنگھ کو لکھا ہے اور کہا ہے کہ کانگرس کے دفتر میں قربانی کی اجازت دی جائے۔ انہوں نے کہا وزیراعظم نریندر مودی کل جب بھوپال آئے تو انہوں نے کہا تھا کہ کوئی بھی لیڈر کسی ایک قوم کے خلاف بیان بازی نہ کرے اور جس طرح سے آل انڈیا اتحاد المسلمن کا خط آیا ہے، اس سے یہ ثابت ہوتا ہے کہ اسد الدین اویسی ان کی بھی ٹیم ہے اور ہونے والے انتخابات میں یہ ہندو مسلم اور ہندوستان پاکستان کریں گے کیونکہ اب انہیں اپنی زمین کھسکتی ہوئی نظر آرہی ہے۔ اس کے علاوہ ان کے پاس کوئی مدعا بچا نہیں ہے، یہ لوگ مہنگائی اور بے روزگاری پر بات نہیں کر رہے ہیں۔ ان کے ذریعے جو بدعنوانیاں ہوئی ہے۔ ان پر یہ بات نہیں کر رہے ہیں۔ یہ لوگ ہندو مسلم ہندوستان اور پاکستان پر بات کر کے لوگوں کو تقسیم کرنا چاہتے ہیں۔
