بھوپال: مدھیہ پردیش میں وزیر اعلی شیوراج سنگھ چوہان کے بارے میں ایک ناخوشگوار سوشل میڈیا پوسٹ کے تناظر میں کانگریس کی ریاستی یونٹ کے صدر کمل ناتھ نے آج کہا کہ بھگوان چوہان کو لمبی زندگی دے اور کانگریس نے ان کے بارے میں کوئی پوسٹ نہیں کیا ہے۔ چوہان کو ٹویٹر پر مخاطب کرتے ہوئے کمل ناتھ نے پوسٹ کیا، ’ایشور آپ کو لمبی عمر دے۔ مجھے سمجھ نہیں آتی کہ آپ کو ہر چیز کے پیچھے کانگریس پارٹی کیوں نظر آتی ہے؟ کانگریس پارٹی نے ایسا کوئی ٹویٹ نہیں کیا ہے جس کا آپ ذکر کر رہے ہیں۔ اگر آپ واقعی محسوس کرتے ہیں کہ کسی نے آپ کے خلاف ٹویٹ کیا ہے تو اس کے خلاف قانونی کارروائی کریں۔
اس کے ساتھ ہی انہوں نے چوہان کو مخاطب کرتے ہوئے کہا، ’آپ کی پارٹی نے آپ کو شرادھ پکشا کا ٹکٹ دیا ہے، کانگریس پارٹی نے نہیں۔ آپ اچھی طرح جانتے ہیں کہ آپ کے ذاتی دشمن آپ کی جماعت میں بیٹھے ہیں اور آپ کو نقصان پہنچانے میں کوئی کسر نہیں چھوڑ رہے ہیں۔ دوسروں پر جھوٹے الزامات لگانے کی بجائے اپنی پارٹی میں نظم و ضبط قائم کرنا بہتر ہے۔ ایشور آپ کو صحت و تندرستی والی لمبی زندگی عطا فرمائے۔
یہ بھی پڑھیں: NewsClick row سی بی آئی نے نیوز کلک کے خلاف ایف سی آر ایکٹ کی خلاف ورزی کا مقدمہ درج کیا
کل سوشل میڈیا پر’ود کانگریس‘ نام کے ہینڈل سے چوہان کے حوالے سے ایک ناخوشگوار پوسٹ کیا گیا تھا۔ اس میں چوہان کو پترو پکش کے دوران پارٹی ٹکٹ دینے کو لے کر ناگوار باتیں کہی گئیں۔ چوہان کے بیٹے کارتکیہ سنگھ چوہان نے اس پوسٹ کو لے کر جذباتی ردعمل ظاہر کیا ہے۔
یو این آئی
