کمل ناتھ نے ٹویٹ کے ذریعہ کہا کہ ،''آج کا دن پوری ریاست میں جمہوریت کا قتل کے 100ویں دن کی شکل میں منایا گیا۔سبھی کو معلوم ہے کہ کس طرح ہماری ایک منتخب کردہ حکومت کو، سازش کے تحت گرا دیا گیا، کس طرح کا کھیل ریاست میں بی جے پی نے کھیلا، یہ سبھی نے دیکھا، ا س سچائی کوتو خود ذمے داروں نے تسلیم کیا کہ کس طرح مرکزی قیادت کے اشارے پر کچھ لوگوں کے ساتھ مل کر یہ کھیل کھیلا گیا۔''
سابق وزیراعلیٰ نے کہا، ''ہماری حکومت اس لئے گرادی گئی کیونکہ ہم کسانوں کا قرض معاف کررہے تھے، نوجوانوں کو روزگاردے رہے تھے، خواتین کو عزت وتحفظ فراہم کررہے تھے،ریاست میں مافیاؤں کے خلاف مہم چلارہے تھے، گوشالائیں بنا رہے تھے۔ریاست میں سرمایہ کاری کررہے تھے۔''
کمل ناتھ نے ٹوئٹ میں بتایا کہ وہ جھوٹے اعلانات نہیں کررہے تھے۔ بی جے پی کو خوف تھا کہ اگر ایسے ہی عوامی فلاح کے کام ہوتے رہے تو اس کا سالوں تک اقتدار میں واپس آنا ناممکن ہوجائے گا ۔بی جے پی حکومت کے 100 دن بھی ہم سبھی نے دیکھے ہیں۔
انہوں نے آگے کہا کہ، 'کس طرح آج کاشت کاراور غریب پریشان ہیں۔مہاجر مزدور کی حالت سبھی نے دیکھی۔بھاری بھرکم بجلی کی بلوں سے عوام پریشان ہے،پٹرول ڈیزل کی قیمتوں میں اضافہ سے عام لوگ پریشان ہیں۔'
کورونا کنٹرول میں حکومت کی ناکامی ہم سب دیکھ رہے ہیں،ان 100دن میں ہم نے صرف جھوٹے اعلانات کرنے والی حکومت دیکھی ہے۔ جسے عوامی مفاد سے کوئی سروکار نہیں ہے۔کانگریس نے بی جے پی کے سو دن پورے ہونے کی مخالفت میں آج پوری ریاست میں یوم سیاہ منایا۔
