آگر مالوا شہر میں روڈ شو کے دوران ایک صحافی کے سوال کے جواب میں پرگیہ سنگھ کا کہنا تھا کہ 'ناتھو رام گوڈسے محب وطن تھے، ہیں اور رہیں گے'۔
واضح رہے کہ فلمی دینا سے سیاست میں قدم رکھنے والے اداکار کمل ہاسن نے اتوار کے روز کہا تھا کہ 'آزاد بھارت کا پہلا دہشت گرد ایک ہندو تھا اور وہ ناتھو رام گوڈسے تھا۔'
پرگیہ ٹھاکر نے نہ صرف ناتھو رام گوڈسے کو محب وطن قرار دیا بلکہ یہ بھی کہا کہ 'جو لوگ انہیں ( گوڈسے کو) دہشت گرد کہتے ہیں، وہ اپنے گریبان میں جھانک کر دیکھیں ایسا بولنے والوں کو اس انتخاب میں جواب دے دیا جائے گا'۔
جب صحافی نے ان سے پوچھا کہ کیا آپ ناتھو رام گوڈسے کی حمایت کرتی ہیں؟ اس سوال کوانہوں نے نظر انداز کرکے اپنے روڈ شو کو جاری رکھا۔
واضح رہے کہ اس سے قبل پرگیہ نے کہا تھا کہ انسداد دہشت گرد دستے (اے ٹی ایس) کے چیف ہیمنت کرکرے نے مالیگاؤں دھماکے معاملے کی جانچ کے دوران انہیں زبردست تکلیف پہنچائی تھی اور ان کی بد دعا سے ہی کرکرے کی 26/11 دہشت گردانہ حملے میں موت ہوئی تھی۔ اس کےعلاوہ انہوں نے ایک بیان دیا تھا کہ 1992 میں ایودھیا میں بابری مسجد مسمار کرنے میں وہ بھی شامل تھیں اور اس پر انہیں فخر ہے۔ اس بیان پر انتخابی کمیشن نے انہیں نوٹس جاری کیا تھی جس کے بعد پرگیہ نے آنجہانی آئی پی ایس افسر کے خلاف اپنے بیان کے لیے معافی مانگی تھی۔
