ریاست مدھیہ پردیش کے دارالحکومت بھوپال کی تنظیم بی بی ایم گروپ برادر ہوڈ فور مسلمس گزشتہ سال یعنی کورونا کے وقت سے لے کر اب تک مسلسل خدمت خلق کا کام کر رہے ہیں۔
بی بی ایم گروپ کے ذریعہ جہاں کورونا کے وقت لوگوں کے لیے کھانے کا انتظام کیا گیا ہے تو وہیں اس گروپ کے ذریعہ کورونا سے مرنے والوں کو اسلامک طریقے سے تدفین کا کام بھی جاری ہے۔
اب اس گروپ کے ذریعہ آکسیجن کی قلت کا سامنا کر رہے بھوپال میں ضرورت مندوں کو مسلسل آکسیجن ان کے گھروں تک پہنچایا جا رہا ہے۔
کورونا کرفیو کے چلتے سب بند ہونے کی وجہ سے لوگوں کے روزگار پر اثر پڑ رہا ہے اس کے پیش نظر ضرورتمندوں کو راشن بھی تقسیم کیا جا رہا ہے۔چونکہ بھوپال میں کورونا کے علاج کے لئے لوگ باہر سے آ رہے ہیں اور بہت سے لوگوں کو علاج کے دوران موت بھی واقع ہوئی ہے۔
ان کے پاس پیسے نہ ہونے کے سبب ان لوگوں کے سامنے ان کے کفن اور تدفین کا مسئلہ ہو جاتا ہے، جسے دیکھتے ہوئے ایسے مجبور لوگوں کے لئے مفت کفن کا انتظام بھی کیا جارہا ہے۔
ساتھ ہی یہ تنظیم بغیر مذہبی فرق کیے تمام مذاہب کے لوگوں کے لئے مدد کر رہی ہے۔
