ریاست مدھیہ پردیش کی تنظیم شہر غزل کلچر سوسائٹی کے زیر اہتمام بھوپال میں ادبی تقریب کا انعقاد کیا گیا۔ ادبی تقریب میں ممتاز ادیب عشرت قادری کی حیات و خدمات پر محققین نے مقالے پیش کیے اور اردو تحقیق کے میدان میں نئی نسل کے نمایاں محقق ڈاکٹر نعیم انصاری کو عشرت قادری ایوارڈ سے سرفراز کیا گیا۔
عشرت قادری کا شمار مالوا کے ممتاز اردو شاعر و صحافی میں ہوتا ہے۔ عشرت قادری شفا گوالیاری کے شاگرد اور مالوا میں سلسلہ داغ کے کے اہم جانشیں تھے۔
عشرت قادری کی برسی کے موقع پر ہر سال 17 مئی کو بھوپال میں ادبی تقریب کے ساتھ ایوارڈ تقریب کا انعقاد کیا جاتا ہے لیکن اس بار کورونا وبا کے سبب پروگرام کا انعقاد ممکن نہیں ہو سکا، اب جبکہ بھوپال میں کورونا کے معاملوں میں کمی آئی ہے اور حالات کچھ سازگار ہوئے ہیں تو سوسائٹی کے زیر اہتمام تقریب کا انعقاد کیا گیا ہے۔
تقریب میں بھوپال کے ممتاز ادیبوں نے شرکت کی اور عشرت قادری کی حیات و خدمات پر تفصیل سے روشنی ڈالی۔ اس پروگرام کی انفرادیت یہ ہے کہ اس میں ایوارڈ اردو کسی بزرگ شخصیت کو نہ دے کر بلکہ تحقیق کے میدان میں نمایاں کام کرنے والی نئی نسل کے فنکاروں کو دیا جاتا ہے۔
شہر غزل کلچرل سوسائٹی کے مطابق ان کا مقصد ہے کہ نئی نسل میں اردو کو عام کیا جائے۔ یہی وجہ ہے کہ نئی نسل کی حوصلہ افزائی کرنے کے لئے تحقیق کے میدان میں نمایاں کام کرنے والے نئی نسل کے فنکار کا انتخاب کیا جاتا ہے۔
