دیہی ترقی کے مرکزی وزیر مملکت فوگن سنگھ کولستے وزیر اعظم کے عوامی آؤٹ ریچ پروگرام کے تحت ضلع کپواڑہ کے دو روزہ دورے پر آئے۔ اس موقعے پر گورنمنٹ میڈیکل کالج ہندواڑہ کے زیر تعمیر 500 بستروں پر مشتمل ایسوسی ایٹڈ ہسپتال کے معائنہ کے بعد خطاب کرتے ہوئےکہ ہندواڑہ میڈیکل کالج ملک بھر کے 75 کالجوں میں سے ایک ہے جسے مرکزی حکومت نے ملک کے دیہی علاقوں میں صحت کے بنیادی ڈھانچے اور صحت کی سہولیات کی اپ گریڈیشن کے حصے کے طور پر منظور کیا ہے۔
قبل ازیں، وزیر نے پی ایم جی ایس وائی پراجیکٹ کے تحت 3.96 کروڑ روپے کی لاگت سے تعمیر ہونے والی 4 کلومیٹر ماگام-اوچھر سڑک کا افتتاح کیا۔ یہ سڑک اچر، ماگام اور دیگر دیہات کے رہائشیوں کو بہتر رابطہ فراہم کرے گی۔
اس موقع پر ڈپٹی کمشنر کپواڑہ، امام دین، ڈی ڈی سی نوٹنسا، ظہور احمد، اے ڈی سی ہندواڑہ، ایس پی ہندواڑہ اور دیگر متعلقہ افسران موجود تھے۔
بعد میں وزیر نے ڈی ڈی سی، بی ڈی سی، پی آر آئی، عوامی وفود اور پارٹی کارکنوں کے ساتھ انوائرمنٹ ہال ہندواڑہ میں ایک تفصیلی میٹنگ بلائی۔
اس موقع پر چیئرمین ڈی ڈی سی، وائس چیئرمین ڈی ڈی سی، ڈی ڈی سی ممبران اور بی ڈی سی چیئرپرسنز نے خطاب کیا اور وزیر کے ساتھ اپنے علاقوں کے ترقیاتی مسائل پر تفصیلی تبادلہ خیال کیا۔
عوامی نمائندوں نے سیاحتی مقام بنگس کی ترقی، واٹر سپلائی سکیموں میں اضافہ، بارہمولہ-کپواڑہ چار لین ہائی وے کی تیز رفتار تعمیر، ضلع کپواڑہ تک ریلوے کی توسیع اور دیگر مسائل کے تعلق سے انہیں آگاہ کیا۔
وزیر نے جموں و کشمیر یو ٹی کی بالخصوص ضلع کپواڑہ کے سرحدی اور پہاڑی علاقوں کی مجموعی ترقی کے لیے مرکزی حکومت کے عزم کی یقین دہانی کا اعادہ کیا۔ انہوں نے انہیں یہ بھی یقین دلایا کہ عوامی نمائندوں کے ساتھ ساتھ وفود اور پارٹی کارکنوں کے پیش کردہ تمام مطالبات کو پورا کرنے کے لیے وزیر اعظم کے سامنے پیش کیا جائے گا۔ انہوں نے مزید کہا کہ عوامی آؤٹ ریچ پروگرام کا واحد مقصد جموں و کشمیر کے ترقیاتی منظرنامے کا جائزہ لینا ہے۔'
انہوں نے کہاکہ وہ مختلف مطالبات کا معاملہ ایل جی منوج سنہا کے ساتھ شکایات کے بروقت ازالے کے لیے بھی اٹھائیں گے۔ انہوں نے یہ بھی کہاکہ مرکزی حکومت کے مہتواکانکشی جل زندگی مشن کے مطابق 2022 تک ہر گھر کو نل کے پانی کا کنکشن ملے گا۔
