انہوں نے کہا کہ 'سرحد پار سے جاری گولہ باری میں نہ صرف انسانی جانیں ضائع ہوئی ہیں بلکہ رہائشی مکانات کو بھی نقصان پہنچا ہے۔'
انہوں نے کہا کہ 'سردیوں کے ان ایام میں محفوظ مقامات کی طرف جانا بھی مشکل ہے کیونکہ موسمی حالات ٹھیک نہیں ہیں۔'
احتجاج کرنے والوں نے علاقے میں فوری طور پر انفرادی بنکرز کی تعمیر کا مطالبہ کرتے ہوئے کہا کہ 'جنگ بندی کی مسلسل خلاف ورزیوں کی وجہ سے ہمارے بچوں کی تعلیم اور کاروبار کو بہت زیادہ نقصان ہوا ہے۔'
احتجاج میں شامل ایک شہری نے بتایا کہ 'ہم سرحدی باشندوں کو بہت پریشانی کا سامنا کرنا پڑ رہا ہے کیونکہ پہلے ہی ہم لوگ بنیادی سہولیات سے محروم ہیں اور اب سرحد پار سے بھی ہر چند دنوں کے بعد گولہ باری ہو رہی ہے جس سے ہماری مشکلات میں اضافہ ہوتا جا رہا ہے'۔
انہوں نے کہا کہ 'ہمیں گولہ باری کے قہر سے بچایا جائے اور اس کے لیے انفرادی بنکرز تعمیر کیے جائیں۔'
احتجاجی افراد نے ایل جی مرمو سے اپیل کی کہ 'وہ سرحدی عوام کی مشکلات کو دیکھیں تاکہ بارڈر کے علاقوں میں بسنے والے لوگوں کو کچھ راحت مل سکے۔'
