ایک مشترکہ پریس کانفرنس کے دوران ڈپٹی کمشنر کپواڑہ امام دین اور ایس ایس پی کپوارہ یوگل منہاس نے کہا کہ ضلع میں اقلیتی برادریوں کے لیے حفاظتی احاطہ بڑھادیا گیا ہے اور کہا گیا ہے کہ کسی بھی عنصر کو ضلع میں سماجی تانے بانے اور فرقہ وارانہ ہم آہنگی کو نقصان پہنچانے کی اجازت نہیں دی جائے گی۔
ڈپٹی کمشنر نے کہا کہ انہوں نے ایس ایس پی کپواڑہ کے ساتھ مل کر مہاجر کالونی اور دیگر مقامات پر رہنے والی مہاجر کمیونٹی کے ساتھ بات چیت کی ہے اور ان کے ساتھ مختلف امور پر تبادلۂ خیال کیا گیا ہے۔
مکینوں کی مانگ پر مہاجر کالونی میں سولار لائٹس بھی لگائی گئی ہیں۔ ڈپٹی کمشنر نے مہاجر کمیونٹی کو انتظامیہ پولیس اور عوام کی طرف سے ان کی حفاظت کے بارے میں تمام ضروری تعاون کی یقین دہانی کرائی۔
انہوں نے مزید کہا کہ گھبرانے کی ضرورت نہیں ہے۔ ڈپٹی کمشنر نے کہا کہ ان کے مسائل کے فوری ازالے کے لیے مہاجر برادری کے ساتھ قریبی رابطہ رکھنے کے لیے ایک نوڈل افسر بھی نامزد کیا گیا ہے۔ ڈپٹی کمشنر نے تمام اسٹیک ہولڈرز سے اپیل کی کہ وہ اکٹھے ہوں اور ان مذموم عناصر کی مذمت کریں جو پُرامن ماحول کو نقصان پہنچانے کے لیے ناکام ہوشش کررہے ہیں۔
ایس ایس پی کپواڑہ منہاس نے کہا کہ انہوں نے کمیونٹی کو مکمل تعاون کی یقین دہانی کرائی اور کہا کہ پولیس کسی بھی عنصر کو ضلع میں امن اور خوشگوار ماحول کو خراب کرنے کی اجازت نہیں دے گی۔ ساتھ ہی ضرورت ہو وہاں ضروری سکیورٹی فراہم کی جائے گی۔
