رویندر رینہ نے جمعہ کو جنوبی کشمیر کے قاضی گنڈ کے وائی کے پورہ کا دورہ کیا جہاں وہ گزشتہ روز عسکریت پسندوں کے حملہ میں مارے گئے تین پارٹی ورکروں کے گھر گئے اور لواحقین کے ساتھ تعزیت کا اظہار کیا۔
میڈیا سے بات کرتے ہوئے رویندر رینہ نے کہا کہ ’’عسکریت پسند بوکھلا گئے ہیں اس لئے وہ ایسی بزدلانہ حرکت کرکے بے گناہ شہریوں کو اپنا نشانہ بناتے ہیں۔‘‘ انہوں نے کہا کہ ’’عسکریت پسندوں کی اس انسانیت سوز حرکت کو بخشا نہیں جائے گا اور جلد ہی انہیں کیفرکردار تک پہنچایا جائے گا۔‘‘
رینہ نے مارے گئے کارکنان کو قوم پرست قرار دیتے ہوئے کہا کہ وہ ’’خدمت خلق کے جذبے سے سرشار تھے، ان کی ہلاکت سے نہ صرف قوم بلکہ پارٹی کو بھی کافی نقصان ہوا ہے۔ لہذا مصیبت کی اس گھڑی میں پارٹی لواحقین کے دکھ میں برابر کی شریک ہیں۔‘‘
انہوں نے پاکستان کو بھی تنقید کا نشانہ بناتے ہوئے کہا کہ ’’کشمیر کو برباد کرنے کے لئے پاکستان اپنے ناپاک منصوبے بنا رہا ہے جسے کبھی بھی کامیاب نہیں ہونے دیا جائے گا۔‘‘
رویندر رینہ کے ہمراہ قاضی گنڈ کے دورے پر پارٹی کے نائب ریاستی صدر صوفی یوسف اور کشمیر صوبہ کے پارٹی ترجمان الطاف ٹھاکر سمیت دیگر کئی لیڈران بھی موجود تھے۔
واضح رہے کہ گزشتہ شب عسکریت پسندوں نے قاضی گنڈ میں بی جے پی کے کارکنان پر حملہ کیا جس میں پارٹی کے تین کارکن ہلاک ہو گئے تھے۔
