بھارتیہ جنتا پارٹی کے ضلع صدر کولگام عابد حسن خان نے ضلع انتظامیہ پر سخت نکتہ چینی کی۔
ضلع صدر نے انتظامیہ کو تنقید کا نشانہ بناتے ہوئے کہا کہ محکمۂ موسمیات کی قبل از وقت پیش گوئی کے باوجود ضلع انتظامیہ نے برفباری کے پیش نظر خاطر خواہ انتظامات نہیں کیے۔
خان نے منگل کو ضلع کولگام کے کئی علاقوں کا دورہ کرکے عوام کو درپیش مشکلات کا جائزہ لیا۔ دورے کے دوران انہوں نے کہا کہ برفباری کے سبب ضلع کے مختلف علاقہ جات، جن میں دمحال ہانجی پورہ، کنڈ، ہوم شالی بگ، اور دیوسر وغیرہ قابل ذکر ہیں، ابھی تک ضلع ہیڈکوارٹر سے منقطع ہیں۔
انہوں نے کہا کہ علاقے میں بیشتر مقامات پر بجلی کا نام و نشان نہیں، وہیں متعدد علاقوں کو جانے والی سڑکوں پر سے ابھی تک برف ہٹانے کا کام مکمل نہیں کیا گیا۔
انہوں نے گورنر انتظامیہ سے مداخلت کی اپیل کرتے ہوئے کہا کہ برفباری کے دوران عوام کو راحت پہنچانے کے لیے فی الفور متعلقہ افسران و محکمہ جات کو ہدایات جاری کی جائیں۔
