ضلع کشتواڑ کے پاڈر علاقہ میں ایک ہفتہ کے دوران دو الگ الگ سڑک حادثات میں کم از کم پندرہ افراد ہلاک ہوئے ہیں جن کی لاشیں ابھی تک بازیاب نہیں ہوئی ہیں۔ یہاں راحت و بچاؤ کا کام جاری ہے۔
جمعرات کی صبح کشتواڑ کے ایک گاؤں گڑھ سے مسو تحصیل پاڈر کی طرف جا رہی آلٹو گاڑی جوں ہی بدھ نالہ نزدیک گڑھ پہنچی تو ڈرائیور کے قابو سے باہر ہو کر دریائے چناب میں گر گئی اور اُس میں سوار چھ افراد ڈوب گئے۔
عینی شاہدین کے مطابق حادثہ کے وقت گاڑی میں ایک ہی خاندان کے پانچ افراد سوار تھے جو دریائے چناب کی تیز لہروں میں بہہ گئے۔ حادثہ کی خبر پھیلتے ہی مقامی لوگوں نے پولیس کو اطلاع دی اور بچاؤ کاروائی شروع کر دی، لیکن دریائے چناب میں پانی کی سطح میں اضافہ کی وجہ سے کسی کو بھی دریائے چناب سے بازیاب نہیں کیا جا سکا۔
دریا میں ڈوبنے والوں کی شناخت ملک راج ولد رام ناتھ ڈرائیور، منی دیوی دختر ملک راج، کیلاشہ دیوی دختر ملک راج، انامیکہ دیوی دختر چونی لال، شالو دختر نریندر کمار ، سوناکشی دختر نریندر کمار کے طور پر ہوئی ہے۔ مقامی لوگوں کے مطابق جس جگہ سڑک حادثہ ہوا ہے پہاڑی علاقہ ہے اور سڑک کی حالت گلاب گڑھ تک دس کلو میٹر خراب ہے۔
