کیرالہ لینڈ سلائیڈ: ملبے سے 18 لاشیں برآمد

کیرالہ میں ضلع اڈوکی کے مونار میں بڑے پیمانے پر مٹی کے تودے گرنے کے بعد ملبے تلے دبے 18 افراد کی لاشیں ملی ہیں۔

راحت رسانی آپریشن کے تحت 12 افراد کو موقع سے بچایا گیا ہے اور 48 دیگر لاپتہ افراد کی تلاش جاری ہے۔ اگست کے شروع میں ہونے والی موسلا دھار بارش سے کیرالہ اور خاص طور پر ضلع اڈوکی میں بڑے پیمانے پر تباہی ہوئی ہے۔
مٹی کے تودے گرنے سے چار گلیوں کے 30 گھروں میں رہنے والے کل 79 افراد میں سے 66 افراد لاپتہ ہوگئے ہیں۔
ذرائع نے ہفتہ کے روز بتایا کہ یہ علاقہ لینڈ سلائیڈ زون کے طور پر درج نہیں تھا۔
نیشنل ڈیزاسٹر رسپانس فورس کی ٹیم لاپتہ افراد کی تلاش کررہی ہے، لیکن شدید بارش نے مشکلات میں مزید اضافہ کردیا ہے۔
بچائے جانے والوں میں سے 11 افراد مختلف اسپتالوں میں زیر علاج ہیں۔ ان میں سے 10 افراد کی حالت مستحکم ہے، جبکہ کالینچیری میڈیکل کالج میں داخل ایک شخص کی حالت تشویشناک بتائی جاتی ہے۔
اڈوکی شہر، پیرومیڈو اور مونار میں جمعہ کے روز موسلا دھار بارش ہوئی تھی جس کی وجہ سے یہ لینڈ سلائیڈنگ ہوئی۔