سونا اسمگلنگ معاملہ میں کلیدی ملزم سواپنا سریش کے قدآور سیاسی قائدین کے ساتھ روابط کی بات کہی جارہی ہے۔ وہیں دوسری جانب اپوزیشن قائدین وزیراعلیٰ پر استعفیٰ کےلیے دباؤ ڈال رہے ہیں۔
کانگریس کے رکن پارلیمنٹ اور یو ڈی ایف کے کنوینر بیہانن نے میڈیا کو بتایا کہ سونا اسمگلننگ معاملہ میں نوجوان تاجر کرن کے رول کی بھی جانچ کی جانی چاہئے۔ انہوں نے کلیدی ملزم سواپنا اور سندیپ نائب کے ساتھ کرن کے قریبی تعلقات ہونے کا دعویٰ کیا۔
انہوں نے کہا کہ کرن کا حکمراں محاذ کے سیاسی رہنماؤں میں کافی اثر و رسوخ ہے اور اس کے مکان پر قدآور رہنماؤں کا آنا جانا تھا۔ انہوں نے کرن کے گھر جانے والے شخصیات کی جانچ کرنے کا مطالبہ کیا۔
بی جے پی نے بھی سونا اسمگلنگ معاملہ میں کرن کے کردار پر سوال اٹھایا ہے جبکہ کرن نے ان پر لگائے گئے تمام الزامات کو مسترد کردیا۔ کرن نے میڈیا سے بات کرتے ہوئے سخت ردعمل کا اظہار کیا اور کہا کہ ان پر جھوٹے الزامات عائد کئے جارہے ہیں تاہم اس تنازعہ میں ان کا کوئی رول نہیں ہے۔
دریں اثنا کوچی میں این آئی اے عدالت نے آج سواپنا اور سندیپ کی تحویل میں 24 جولائی تک توسیع کردی ہے کیونکہ این آئی اے کی تحقیقاتی ٹیم نے مزید پو چھ گچھ کرنے اور شواہد اکٹھا کرنے کےلیے مزید وقت مانگا تھا۔
یہ بھی پڑھیں: مرکزی وزیر کی راہل گاندھی پر نکتہ چینی
قبل ازیں مرکزی وزارت داخلہ نے NIA کو تھرواننتھاپورم ہوائی اڈے پر سونے کی اسمگلنگ معاملہ کی تحقیقات کی اجازت دی تھی جبکہ اس سے پہلے کیرالہ کے وزیراعلیٰ پنارائی وجیئن نے وزیراعظم نریندر مودی کو ایک خط لکھ کر تھرواننتھاپورم ہوائی اڈے پر سفارتی سفری سامان سے کروڑوں روپے مالیت کا سونا ضبط کئے جانے کی موثر تحقیقات کےلیے کہا تھا۔
واضح رہے کہ 30 کلو گرام سے سونا کیرالہ کے تھرواننتھاپورم بین الاقوامی ہوائی اڈے پر یو اے ای سے آئے سفارتی سفری سامان سے ضبط کیا گیا تھا۔
