جموں و کشمیر کے کٹھوعہ میں گذشتہ دنوں کورونا وائرس کے مشتبہ معاملے سامنے آنے کے بعد آج پولیس انتظامیہ نے ضلع میں سختی بڑھا دی ہے اور مکمل لاک ڈاؤن نافذ کر دیا ہے۔
لاک ڈأن کے دوران ضروری اشیاء کی دکانوں کو کھولنے کی اجازت ہوتی ہے لیکن کٹھوعہ میں تمام دکانیں انتظامیہ نے بند کرا دی ہیں۔
ضلع انتظامیہ کی ہدایت کے مطابق آج سے آئندہ حکم نامے سے قبل تک کٹھوعہ ضلع میں کوئی بھی دکانیں نہیں کھولی جائیں گی۔
اس کے علاوہ کٹھوعہ پولیس کے جوان تمام علاقوں میں گھوم کر لوگوں کو ہدایت دے رہے ہیں کہ وہ اپنے گھروں پر رہیں اور دکانیں نہ کھولیں۔
ایسی حالت میں دودھ ، ادویات سمیت تمام ضروری چیزوں کی دکانوں کو بھی اب کٹھوعہ میں کھولنے کی اجازت نہیں ہے۔ ساتھ ہی ساتھ کسی کو بھی گلی، محلے یا سڑک پر گھومنے کی اجازت نہیں ہے اور مذکورہ ہدایات پر عمل نہ کرنے پر سخت قانونی کاروائی کی تنبیہ بھی دی گئی ہے۔
