کرناٹک کے ضلع یادگیر میں جلسہ سیرت النبیﷺ کا انعقاد عمل میں آیا۔ اس موقع پر مولانا صدر الہدیٰ صدر علماء اہل سنت یادگیر نے اپنے خطاب میں کہا کہ اللہ تبارک و تعالی نے ہر چیز کے لئے وقت مقرر کیا ہے۔
اللہ نے نماز کے لیے وقت مقرر کیا ہے، حج کے لئے مہینہ مقرر کیا ہے اور حج کے فرائض بتائے گئے ہیں روزہ رکھنے کے اوقات اور مہینہ اور مدت بتائی گئی ہے، لیکن اللہ تبارک و تعالی نے حضورؐ پر درود کا نذرانہ پیش کرنے کے لئے نہ کوئی دن، نہ ہی کوئی وقت اور نہ ہی کوئی مہینہ مقرر کیا ہے بلکہ ہر وقت ہر دم نبی کریمؐ پر درود و سلام بھیجنے کا موقع عطا فرمایا ہے۔
انہوں نے کہا کہ اسی سے ہی نبی کریمؐ کی عظمت و بڑائی اور وقار کا اندازہ ہوتا ہے کہ خود اللہ تبارک و تعالی نے نبی کریمؐ پر درود بھیجتا ہے، فرشتے درود بھیجتے ہیں۔ اس لئے ہمیں اور آپ کو بھی چاہیے کہ ہم بھی نبی کریمؐ پر درود کا نذرانہ پیش کرتے رہیں۔
انہوں نے کہا کہ اللہ کے محبوب پر درود بھیجنے کا یہ فائدہ ہوگا کہ اللہ ہمارے قریب ہوں گے اور انشاء اللہ ہماری نجات ہوگی اور برائیوں سے دور رہیں گے تو دنیا و آخرت میں کامیابی حاصل ہو گی۔
