یادگیر: نرسنگھانند سرسوتی کے بیان کی سخت مذمت

ملک میں آئے دن حضور اکرم صلی اللہ علیہ وسلم کی شان میں گستاخیوں کا سلسلہ جاری ہے، کبھی مذہب کے نام پر، کبھی قرآن اور کبھی اذان پر کوئی نہ کوئی بیان اس طرح دیا جارہا ہے جس سے مسلمانوں کے جذبات مجروح ہو رہے ہیں۔

اسی طرح کا ایک تازہ واقعہ نرسنگھانند سرسوتی کا ہے، جس نے حضور اکرم صلی اللہ علیہ وسلم کی شان میں گستاخی کی ہے۔ ریاست کرناٹک ضلع یادگیر کے مجلس اتحاد المسلمین شاخ یادگیر کے صدر ذاکر احمد نے ای ٹی وی بھارت سے بات کرتے ہوئے کہا کہ حضور اکرم صلی اللہ علیہ وسلم کی شان میں گستاخی ناقابلِ برداشت ہے اور ہم اس کی سخت الفاظ میں مذمت کرتے ہیں۔

انہوں نے کہا کہ اس طرح کی غیر ذمہ دارانہ حرکت اور بیان بازی ملک کی سلامتی کے لیے انتہائی خطرناک ہے اور ملک کی گنگا جمنی تہذیب کو مجروح کرنے کے برابر ہے۔

انہوں نے حکومت ہند سے اپیل کرتے ہوئے نرسنگھا نند سرسوتی کو جلد از جلد گرفتار کرنے کا مطالبہ کیا اور ملک کے وزیر داخلہ امیت شاہ سے پر زور اپیل کی کہ مسلمانوں کے جذبات کو بھڑکانے والے بیانات دینے والوں پر سخت کارروائی کریں۔

ذاکر احمد سوداگر نے مزید کہا کہ کیونکہ کوئی بھی مذہب کسی بھی مذہب کے پیشوا اور اس کے رہنما کی گستاخی برداشت نہیں کرتا، مسلمانوں کے جذبات کا خیال رکھتے ہوئے اس واقعے پر سخت کاروائی کرنا حکومت کا فرض بنتا ہے۔