بنگلور: سپریم کورٹ کے ریٹائرڈ جج و سابق کرناٹک لوکایکتا جسٹس سنتوش ہیگڈے نے اپنا ووٹ ڈالنے کے بعد کہا کہ ووٹ ڈالنا نہ صرف ایک حق ہے بلکہ ہماری اہم ذمہ داری ہے ۔ انہوں نے کہا کہ ووٹینگ کے ذریعہ ہی تبدیلی لاسکتے ہیں۔ وہیں دوسری طرف بات کرتے ہوئے سابق مرکزی وزیر و کانگریس کے سینیئر رہنما ڈاکٹر کے رحمان خان نے عوام سے اپنے خطاب میں کہا کہ سبھی اپنے گھروں سے نکلیں اور ووٹ کریں۔ انہوں نے کہا کہ ووٹ کرتے وقت اس بات کا دھیان رکھیں کہ ریاست کو امن و امان میں رکھنے کے لیے فرقہ پرست طاقتوں کو اقتدار سے دور رکھنا ہے۔
بتا دیں کہ کرناٹک میں جاری اسمبلی انتخابات میں ریاست کی متعدد اہم شخصیات نے اپنے حق رائےدہی کا استعمال کرتے ہوئے عوام کو اہم پیغام دیا۔ وہیں میڈیا سے بات کرتے ہوئے کئی ووٹرز نے کہا کہ اس مرتبہ ہم ووٹ اپنے مستقبل کے لئے دے رہے ہیں۔ بتا دیں کہ کئی ووٹرز اپنا نام ووٹر لیسٹ میں نہ ہونے کے سبب پریشانیوں کا سامنا کر رہے ہیں۔ دراصل کئی افراد کے نام ووٹنگ لسٹ میں موجود نہیں ہے۔
واضح رہے کہ کرناٹک اسمبلی انتخابات کے لیے جاری پولنگ کے دوران کم از کم تین مقامات سے پُرتشدد واقعات کی اطلاع ملی ہے۔ وجئے پورہ ضلع کے باسوانا باگے واڑی تعلقہ کے مسابینال گاؤں میں کئی مشتعل افراد نے کچھ الیکٹرانک ووٹنگ مشینوں، وی وی پی اے ٹی (ووٹر ویریفائی ایبل پیپر آڈٹ ٹریل) مشینوں کو تباہ کر دیا اور پولنگ افسران کی گاڑیوں کو نقصان پہنچایا۔ دیگر دو واقعات بالترتیب بنگلورو کے پدمنابھ نگر حلقہ اور بلاری ضلع کے سنجیواریانا کوٹ میں رپورٹ ہوئے ہیں۔
