کرناٹک کے چک بلاپور ضلع کے یوگو مدانکانے گاؤں میں اتوار کو گاؤں والوں نے ایک گھرکو آگ کے حوالے کردیا کیونکہ اس گھر کے مالک نے اپنی بیٹی کی خودکشی کرنے سے ناراض ہوکر اس کے عاشق کو مار ڈالا تھا۔
پولس نے بتایا کہ آگ لگنےکے اس واقعے میں گھر کا ایک فرد گنگاراجو (25) شدید طور سے جھلس گیا جسے بعد میں ہسپتال میں بھرتی کرایا گیا۔
پولس نے بتایا کہ سنیچر کو اپنی بیٹی کی خودکشی سے ناراض ویکٹیشپا نے بیٹی کے عاشق ہریش کو مبینہ طور پر قتل کردیا۔ اس کے بعد مشتعل گاؤں والوں اور ہریش کے خاندان والوں نے وینکٹشپا کے مکان میں آگ لگادی۔
پولس سپرنٹنڈنٹ متھن کمار نے بتایا کہ دس ماہ پہلے ہریش اور وینکٹیشپا کی بیٹی فرار ہوگئے تھے، لیکن بعد میں دونوں گاؤں واپس لوٹ آئے۔ اس کے بعد ہریش نے ویکٹیشپا کی بیٹی سے شادی کرنے کی خواہش کا اظہار کیا تھا۔ لیکن وینکٹیشپا اس شادی کے لئے راضی نہیں تھا کیونکہ ہریش بے روزگار تھا۔ اس سے مایوس ہوکر لڑکی نے خودکشی کرلی۔
بتایاگیا کہ بعد میں لڑکی کے والدین نے خودکشی کے لئے ہریش کو ذمہ دار قرار دیتے ہوئے ہریش کو قتل کردیا۔ اس بات سے ناراض گاؤں والوں نے وینکیٹشپا کے مکان میں آگ لگادی۔انہوں نے بتایا کہ صورتحال تناؤ سے پر ہے لیکن کنٹرول میں ہے۔ گاؤں میں ایڈیشنل پولس فورس کو تعینات کردیا گیا ہے۔
