کرناٹک کے ضلع یادگیر میں ڈپٹی کمشنر ڈاکٹر راگا پریا نے سپنا گراؤنڈ میں منعقد ویکسین معلوماتی پروگرام سے خطاب کرتے ہوئے کہا کہ انتظامیہ نے محکمہ صحت کے تعاون سے 90 فیصد فرنٹ لائن ورکرز کو ویکسین کی پہلی ڈوز دی ہے۔ محکمہ پولیس، بلدیہ، گرام پنچایت اور دیگر سرکاری محکمہ جات سے جڑے ملازمین کو پہلا ڈوز دیا جاچکا ہے۔
انہوں نے کہا کہ یادگیر ضلع میں اب تک ویکسین لینے کے بعد کوئی بھی ناخوشگوار واقعہ پیش نہیں آیا ہے جبکہ ٹیکہ لینے والوں میں معمولی بخار کی علامات پائی گئیں ہیں۔ انہوں نے ویکسین کو سو فیصدی محفوظ قرار دیا۔
یہ بھی پڑھیں:: یادگیر: ڈسٹرکٹ ہیلتھ آفیسر سے خصوصی بات چیت
ڈاکٹر راگا پریا نے کہا کہ 18 سال سے زیادہ عمر کے تمام افراد ویکسین لے سکتے ہیں۔ انہوں نے بتایا کہ بعض لوگ یہ غلط باور کر رہے ہیں کہ کورونا سے صحتیاب ہونے والے افراد کےلیے ویکسین ضروری نہیں ہے جبکہ ایسا نہیں ہے۔ انہوں نے کورونا سے صحتیاب ہونے والوں کو بھی ویکسین لینے کا مشورہ دیا۔
انہوں نے کہا کہ کورونا سے صحتیاب افراد کو دوبارہ کورونا ہوسکتا ہے تاہم ویکسین لینے سے اس کے اثرات کو کم کیا جاسکتا ہے۔ ضلع یادگیر میں 9 لاکھ سے زائد افراد کو ویکسین دینے کا ہدف مقرر کیا گیا ہے۔ انہوں نے کہا کہ ضلع میں 100 فیصد افراد کو ویکسین لگائی جائے گی۔
