کرناٹک کے اڈوپی میں ایک پری یونیورسٹی کالج میں مسلم طالبات کے ساتھ امتیازی سلوک کا معاملہ سامنے آیا ہے جس کے حل کے سلسلے میں بات چیت سے کامیابی نہ ملنے پر کیمپس فرنٹ نے احتجاج کا انتباہ دیا۔
تفصیلات کے مطابق کرناٹک کے اڈوپی شہر کے سرکاری پری یونیورسٹی کالج میں مسلم طالبات کے حجاب پہننے پر پابندی Ban on Hijab for Muslim Students in Udupi College Karnataka عائد کی گئی ہے۔ اس سلسلے میں طالبات کے والدین کی کالج پرنسپل سے بات چیت میں بھی کوئی حل نہیں نکل پایا۔
اس معاملے میں طالبات کا کہنا ہے کہ ایک عرصے سے کالج انتظامیہ کی جانب سے اس قسم کا امتیازی رویہ انہیں جھیلنا پڑھ رہا ہے۔ ان کا کہنا ہے کہ حجاب پر پابندی لگانا غیر دستوری عمل ہے۔
اس معاملے سے متعلق کیمپس فرنٹ کے ذمہ دار مسعود منا نے بتایا کہ ان کے ایک وفد نے کالج پہنچ کر مسئلے کا جائزہ لیا اور پرنسپل سے ملاقات کی لیکن انہیں کوئی مثبت جواب نہیں ملا اور پرنسپل نے انہیں دھمکی بھی دی۔
مسعود منا نے کہا کہ 'کیمپس فرنٹ کی جانب سے اعلی افسران سے رجوع کئے جانے کے نتیجے میں پرنسپل کو آرڈر جاری کیا گیا کہ مذکورہ طالبات کو کلاسز میں حجاب کے ساتھ داخلہ دیا جائے لیکن اس پر بھی طالبات کو داخلہ نہیں دیا گیا۔
اس سلسلے میں کیمپس فرنٹ نے پرنسپل کو انتباہ دیا کہ اگر طالبات کو حجاب کے ساتھ کالج کلاسز میں داخلہ نہیں دیا گیا تو پُرزور احتجاج کیا جائے گا۔
