بنگلور: قرآن مقدس میں وارد ہے ''جاء الحق وزهق الباطل''، فرمان الٰہی ہے کہ 'بے شک حق ظاہر ہوگا و باطل برباد ہوگا۔' کربلا کی جنگ حق و باطل کے درمیان فرق کی علامت اور انسانیت کے بقا کی جنگ تھی۔ کربلا ایک درسگاہ ہے، جہاں زندگی کا ہر دستور موجود ہے جس کو سیکھنے و عمل کرنے سے زندگیوں میں انقلاب ممکن ہے۔ انہیں جذبات و احساسات کے ساتھ شہر بنگلور و علی پور میں فرزندان توحید نے یوم عاشورہ کے موقعے پر امام حسین کی قربانیوں کو یاد کیا۔
اس موقعے پر علماء کرام نے کہا کہ ہر دور کی طرح موجودہ دور میں بھی حق کا بول بالا ہوگا اور باطل مٹ کر رہے گا۔ اس موقعے پر شبیہ کربلا کا بھی اہتمام کیا گیا جہاں پر کربلا کے دردناک حالات و مناظر کو دکھایا گیا۔ دنیا بھر کے مسلمان امام حسین کی شہادت کی یاد مناتے ہیں۔ محرم اسلامی کیلنڈر کا پہلا مہینہ ہے اور محرم کی 10ویں تاریخ کو امام حسین ابن علی اور ان کے پیروکار 61 ہجری یا 680 عیسوی میں کربلا کی جنگ میں، موجودہ عراق میں شہید ہوئے تھے۔
حضرت امام حسینؓ حضرت علیؓ کے بیٹے اور رسول اللہﷺ کے نواسے تھے۔ محرم ان کی شہادت کی یاد مناتا ہے اور یہ 14 صدیاں قبل ہونے والی کربلا کی جنگ میں ان کی شہادت پر غم کے اظہار کی علامت ہے۔ محرم پوری دنیا کے مسلمانوں کے لیے ایک مقدس مہینہ ہے اور بھارت میں بھی سبھی اپنے اپنے طریقے سے واقعے کربلا کو یاد کرتے ہیں۔ ہر سال ہندوستان کے مسلمان مذہبی جوش و خروش سے محرم مناتے ہیں۔
مزید پڑھیں: Muharram Procession In Delhi یوم عاشورہ کے موقع پر دہلی کے مختلف مقامات میں تعزیہ جلوس نکالے گئے
محرم کا مہینہ کربلا میں امام حسین اور ان کے اہل خانہ کی شہادت کی روحانی عکاسی اور یاد کا وقت ہے۔ ہر سال محرم کی تاریخیں گریگورین کیلنڈر میں مختلف ہوتی ہیں کیونکہ اسلامی کیلنڈر قمری چکر پر مبنی ہے۔ عام طور پر سعودی عرب، عمان اور متحدہ عرب امارات جیسے ممالک بھارت، بنگلہ دیش، پاکستان، مراکش، انڈونیشیا، سنگاپور اور ملائیشیا سے ایک دن پہلے ہلال کا چاند دیکھتے ہیں۔
