بیدر: ڈاکٹر عبد القدیر صدر رابطه ملت ضلع بیدر و تاسیسی رکن آل انڈیا مسلم پرسنل لاء بورڈ نے ایک پریس نوٹ جاری کر کے بتایا ہے کہ مسلمانوں کے ایمان پر ڈاکہ ڈالنے کی ہر دور میں کوششیں ہوتی رہی ہیں۔ اس دور میں مسلمانوں کو فکری تہذیبی یلغار کا سامنا ہے۔ مغربی تہذیب کی چکا چوند نے مسلم نوجوانوں کو بے انتہا متاثر کیا ہے، اور انھیں ارتداد کا شکار بنارہی ہے۔ ہر دردمند اور عاقبت اندیش مسلمانوں کو فوری اس مسئلہ کا حل تلاش کرنے کی ضرورت ہے تاکہ مسلم معاشرہ اور بطور مسلم لڑکے لڑکیاں اس فکری و تہذیبی یلغار سے محفوظ رہ سکیں۔ حالات کی اس سنگینی کو محسوس کرتے ہوئے رابطہ ملت ضلع بیدر نے تمام تعلقہ جات میں مرد و خواتین کے لیے یکم / اگست تا 4 / اگست 2023ء چار روزہ اجتماعات بعنوان ”فکری و تہذیبی ارتداد، اسباب و حل منعقد کر رہی ہیں۔
یہ بھی پڑھیں:
ان اجتماعات کو بطور مہمانِ مقرر شرکت کرتے ہوئے حضرت مولانا مہدی حسن عینی قاسمی، ڈائریکٹر اسلامک اکیڈیمی دیوبند، آرگنائزر اصلاح معاشرہ کمیٹی آل انڈیا مسلم پرسنل لاء بورڈ اور حضرت مولانا محمد عثمان حبان دلدار قاسمی ناظم تعلیمات دار العلوم محمدیہ بنگلور، ایڈیٹر ماہنامہ نقوش عالم بنگلور سیر حاصل و بصیرت افروز خطاب کریں گے۔ تمام تعلقہ جات میں 8 پروگراموں کی تفصیل اس طرح ہے۔ یکم / اگست بروز منگل بوقت صبح 11 بجے تا نماز ظہر بمقام سپر فنکشن ہال ہمنا آباد، اور بعد مغرب بمقام موتی مسجد چٹگوپہ - 2 / اگست بروز چهار شنبه بوقت صبح 11 بجے تا نماز ظہر بمقام دار السلام فنکشن ہال بسواکلیان اور بعد نماز مغرب بمقام مدینہ مسجد گنج بھالکی منعقد کیے جائیں گے۔
جب کہ 3 / اگست بروز جمعرات بوقت صبح 11 بجے تا نماز ظهر بمقام جامع مسجد فنکشن ہال اوراد اور بعد نماز مغرب بمقام مغل گارڈن فنکشن ہال بیدر اور 4 / اگست بروز جمعہ بیدر کی تاریخی جامع مسجد میں خطبہ جمعہ اور بعد نماز مغرب جنید فنکشن ہال چدری روڈ بیدر پروگرام منعقد ہوں گے۔ عامۃ المسلمین مردو خواتین سے پرخلوص اپیل کی جاتی ہے کہ مذکورہ بالا پروگراموں میں وقت مقررہ پر تشریف لاکر بھرپور استفادہ کریں۔ خواتین کے لیے پردہ کا معقول انتظام رہے گا۔ شہر بیدر کے تینوں ( مغل گارڈن فنکشن ہال بیدر، جامع مسجد بیدر اور جنید فنکشن ہال بیدر) پروگراموں کو یو ٹیوب اور فیس بک کے Shaheen Group of Institutions پر راست (لائیو Live) نشر کیا جائے گا۔
