بنگلورو میں نریندرہ مودی کے اقتدار والی مرکزی حکومت کے دوسرے میعاد کے دو سال مکمل ہو رہے ہیں اور اس ضمن میں ویلفیئر پارٹی آف انڈیا نے قومی سطح پر مہم بعنوان "بیمار دیش کی یہی پکار، گدی چھوڑو مودی سرکار" کا آغاز کیا ہے۔
اس سلسلے میں بات کرتے ہوئے ویلفیئر پارٹی کرناٹک کے صدر ایڈووکیٹ طاہر حسین نے کہا کہ مودی حکومت نہ صرف کورونا کی وبا پر قابو پانے میں بلکہ ہر محاذ پر پوری طرح سے ناکام ہوچکی ہے۔
اس موقع پر ایڈووکیٹ طاہر حسین نے کہا کہ ملک بھر میں فرقہ پرستی عروج پر ہے اور معیشت برباد حال ہے جب کہ مہنگائی کے ساتھ بے روزگاری بھی بڑھ رہی ہے۔
طاہر حسین نے بتایا کہ وہ اس مہم کے ذریعے عوام الناس کو بیدار کریں گے کہ بی جے پی کی اقتدار والی مرکزی حکومت کس قدر ناکام رہی ہے اور نریندرہ مودی سے مطالبہ کریں گے کہ وہ گدی چھوڈیں تاکہ دوسری اہل اور قابل حکومت ٹھیک سے حکومت چلا سکے۔
