یادگیر کی مکہ مسجد کے امام و خطیب مولانا مفتی محمد زبیر قاسمی نے ماہ صفر سے متعلق سماج میں پائی جانے والی غلط فہمیوں کو دور کرتے ہوئے کہا کہ ’ماہ صفر کو صفرالمظفر، یعنی بھلائی اور کامیابی کا مہینہ قرار دیا گیا ہے، مگر افسوس کہ اس ماہ کو نحوست والا مہینہ کہا جاتا ہے جو جہالت ہے۔
انہوں نے کہا کہ اسلامی بارہ مہینوں میں کوئی بھی مہینہ منحوس نہیں ہے اور سماج میں پھیلی ہوئی غلط فہموں کو دور کرنا وقت کی اہم ضرورت ہے۔
مولانا مفتی محمد زبیر قاسمی نے کہا کہ ماہ صفر سے متعلق لوگوں میں جو غیرشرعی رسومات پائے جاتے ہیں ان کے خلاف بیداری پیدا کرنا ضروری ہے۔ انہوں نے کہا کہ ماہ صفر میں شادی اور کوئی نیا کام شروع نہ کرنا جیسے روایات کا اسلام سے دور دور تک کوئی تعلق نہیں ہے ایسی تمام روایتیں غیرشرعی عمل ہیں۔
انہوں نے کہا کہ دیگر ماہ کی طرح اس ماہ میں بھی تمام جائز و شرعی کاموں کو انجام دیا جاسکتا ہے۔ انہوں نے مسلمانوں کو اللہ اور اس کے رسولﷺ کے بتائے ہوئے راستے پر چلنے کی نصیحت کی۔
