دکشینہ کنڑ (کرناٹک): کرناٹک میں کانگریس حکومت نے بھارتیہ جنتا پارٹی (بی جے پی) کے رہنما پروین کمار نیتارو کی بیوی کا دکشن کنڑ ضلع میں سرکاری خدمات سے عارضی تقرری کا حکم واپس لے لیا ہے۔ ذرائع نے ہفتہ کو اس کی تصدیق کی ہے۔ دراصل، بی جے پی یووا مورچہ کے آنجہانی لیڈر پروین نیتارو کی بیوی نوتن کماری کو سابق وزیر اعلیٰ بسواراج بومائی کے دفتر میں کنٹریکٹ کی بنیاد پر گروپ سی کے عہدے کی پیشکش کی گئی تھی۔ انہوں نے اپنی ڈیوٹی کے بارے میں وضاحت کی اور سابق وزیر اعلی سے منگلور میں کام کرنے کی خواہش ظاہر کی۔ نوتن کماری کی درخواست کے بعد، انہیں منگلور میں ڈپٹی کمشنر کے دفتر کے چیف منسٹر ریلیف فنڈ سیکشن میں اسسٹنٹ کا عہدہ دیا گیا تھا۔
تاہم موجودہ کانگریس حکومت نے اس حکم کو واپس لے لیا۔ ذرائع نے بتایا کہ عام طور پر جب حکومت تبدیل ہوجاتی ہے اس وقت عارضی ملازمین کو عہدہ چھوڑنے کے لیے کہا جاتا ہے اور نوتن کماری کی تقرری سے متعلق کوئی خاص غور نہیں کیا گیا ہے۔ واضح رہے کہ 26 جولائی 2022 کو بی جے پی لیڈر پروین کمار نیتارو کا قتل کر دیا گیا تھا۔ اب اس معاملے کی جانچ نیشنل انویسٹی گیشن ایجنسی (این آئی اے) کر رہی ہے۔ ابتدائی تحقیقات سے پتہ چلا ہے کہ پروین کمار نیتارو کو کسی انتقام کی وجہ سے قتل کیا گیا تھا۔ قابل ذکر ہے کہ ہندو تنظیم کے کارکنوں نے پروین کمار نیتارو کی حمایت میں سوشل میڈیا پر مہم چلائی تھی جس میں سابق سی ایم بومئی پر زور دیا گیا تھا کہ وہ پروین کمار نیتارو کی بیوی نوتن کو سرکاری نوکری دیں۔ اس کے ساتھ ان کے اہل خانہ کے لیے ایک مکان بھی بنوایا گیا تھا۔
یہ بھی پڑھیں: Praveen Nettaru Murder Case این آئی اے کی چارج شیٹ میں پی ایف آئی پر کلر اسکواڈز تشکیل دینے کا الزام
