کرناٹک کی بی جے پی حکومت نے دیوالی کے دوران آتش بازی پر پابندی عائد کردی ہے۔ وزیراعلیٰ بی ایس یدی یورپا نے دیوالی کے دوران پٹاخوں کے استعمال پر پابندی عائد کرنے کا حکم دیا۔
پی ایس یدی یورپا نے کہا کہ ’حکومت دیوالی کے دوران پٹاخے چھوڑنے پر عائد پابندی کے سلسلہ میں بہت جلد جی او جاری کرے گی‘۔ انہوں نے مزید کہا کہ ’حکومت کی جانب سے باضابطہ آڈر پاس کیا جائے گا‘۔
انہوں نے کہا کہ ’ہم نے دیوالی کو سادگی سے منانے کا فیصلہ کیا ہے جبکہ اس سلسلہ میں بہت جلد حکم نامہ جاری کیا جائے گا‘۔ انہوں نے میڈیا سے بات کرتے ہوئے کہا کہ کوویڈ معاملوں میں اضافہ کے پیش نظر اس سال آتش بازی پر پابندی عائد کی گئی ہے۔
کرناٹک کے وزیر صحت کے سدھاکر نے گذشتہ روز بتایا کہ تھا آتش بازی کی وجہ سے کورونا متاثر افراد بری طرح متاثر ہوسکتے ہیں۔ انہوں نے کہا تھا کہ ’ماہرین نے اس سال دیوالی پر پٹاخے جلانے پر پابندی عائد کرنے کا مشورہ دیا ہے‘۔
واضح رہے کہ راجستھان، اڈیشہ، دہلی سمیت دیگر متعد ریاستوں نے پہلے ہی دیوالی کے دوران آتش بازی پر پابندی عائد کرنے کا فیصلہ کیا ہے۔ وہیں دہلی کے وزیراعلیٰ اروند کیجریوال نے دہلی کے عوام سے اپیل کی ہے کہ وہ کسی بھی قیمت پر دیوالی تہوار کے موقع پر آتش بازی سے پرہیز کریں۔ انہوں نے کہا کہ آتش بازی کے ذریعہ آپ خود اپنی فیملی کی زندگیوں کے ساتھ کھیل رہے ہیں۔ دہلی حکومت نے 30 نومبر تک آتش بازی پر امتناع عائد کرنے کا فیصلہ کیا ہے۔
