کرناٹک میں آئندہ تین ستمبر کو ہونے والے کارپوریشن انتخابات کے پیش نظر سیاسی سرگرمیاں عروج پر ہے۔ تمام پارٹیاں اپنے اپنے امیدواروں کے لیے جدوجہد کرتی نظر آرہی ہیں۔
اس سلسلے میں آج کل ہند مجلس اتحاد المسلمین کے صدر بیرسٹر اسدالدین اویسی نے گلبرگہ کا دورہ کیا اور اسلام آباد کالونی گلبرگہ میں ایک پریس کانفرنس کے دوران کہا کہ 'گلبرگہ میں سابقہ وزیر قمر الاسلام کے انتقال کے بعد مسلم قیادت کمزور ہوگئی ہے، جس کی وجہ سے گلبرگہ کے مسلمانوں کو کئی دشواریوں کا سامنا کرنا پڑرہا ہے۔
گلبرگہ میں مسلم قیادت کو مضبوط کرنے کے لئے مجلس نے گزشتہ تین ماہ قبل ہی گلبرگہ شمال سے الیاس سیٹھ کو رکن اسمبلی امیدوار کے طور پر اعلان کیا ہے۔
انہوں نے کہا کہ کارپورشن انتخابات میں مجلس کے میدان میں اترتے ہی کانگریس، جے ڈی ایس، بی جے پی، کے سابقہ وزیر اور لیڈران نے گلبرگہ کے وارڈوں میں چکر لگانے شروع کردئے ہیں۔
اسدالدین اویسی نے بتایا کہ کرناٹک میں گلبرگہ ،ہبلی دھارواڑ، بیلگام سٹی کارپوریشن انتخابات میں مجلس کے امیدوار حصہ لینے جارہے ہیں۔
