مانسون کے ساتھ ہی کسان اپنے اپنے کھیتوں میں بیچ ڈالنے کا کام شروع کرتے ہیں، حکومت کی جانب سے سرکاری قیمت پر کسانوں کو بیج اور کھاد سپلائی کی جاتی ہے۔
اس سلسلے میں کرناٹکا کسان مورچہ کے ریاستی نائب صدر لکشمی کانت پاٹل نے یادگیر ضلع نگران وزیر شنکر سے ملاقات کی اور کسانوں کے مسائل سے متعلق ان کو یادداشت پیش کی۔
اس موقع پر لکشمی کانت پاٹل نے میڈیا سے گفتگو کرتے ہوئے کہا کہ کسانوں کے مسائل اور ان کے حل کے لیے ہم نے ضلع نگران وزیر شنکر کو ایک یادداشت پیش کی ہے۔
اس یادداشت میں بیج اور کھاد سرکاری قیمت پر کسانوں کو جلد مہیا کرانے کا مطالبہ کیا گیا ہے کیونکہ مانسون نے دستک دے دی ہے، ایسے میں کسان حکومت کی جانب سے ملنے والی سہولیات کے منتظر ہیں۔
انہوں نے مزید کہا کہ مانسون کے ساتھ ہی نقلی کھاد کی سپلائی کرنے والے لوگوں کی کثرت ہوتی ہے، حکومت کو چاہیے کہ ایسے نقلی کھاد فروخت کرنے والوں پر نظر رکھے اور ان کے خلاف کارروائی کرے۔ انہوں نے حکومت سے کسانوں کے مسائل کو جلد حل کرنے کی اپیل کی۔ اس موقع پر کرناٹکا کسان مورچہ کے دیگر ذمہ داران بھی موجود تھے۔
